Æрæджы кусын райдыдта мобилон бригад дæр
Республикæйы дарддæр цæуы дзыллон вакцинаци. Ковиды ныхмæ прививкæтæ скодтой 5 мин адæймагæй фылдæр. Æрæджы кусын райдыдта мобилон бригад дæр. Дохтыртæ цæуынц куыстуæттæм, кæнынц медицинон æркаст, æххæст кæнынц анкетæтæ, æмæ афтæмæй прививкæтæ скæнынц бынаты. Бæлвырддæр – Касаты Наирæ.
Дзыллон вакцинаци куы райдыдта, уæд «Стыр Ныхас»-ы советы сæрдар Томайты Шамиль фидарæй сфæнд кодта вакцина скæнын. Зындгонд ирон фыссæг йæ бинойнагимæ æрбацыди прививкæйы дыккаг къæпхæн скæнынмæ. Уæрæсейаг медицинæйыл Томайты бинонтæ æууæндынц. Шамиль йæ зæрдæ дары, йæ дæнцæг сфæлхат кæндзæн кæстæр фæлтæр дæр.
Коронавирусы ныхмæ вакцинаци цæуы дарддæр, æмæ кæй фæнды скæнын, уыдоны нымæц кæны фылдæр, зæгъынц дохтыртæ. Цæмæй прививкæ æнæ рады лæугæйæ скæнай, уый тыххæй республикæйы кусы хæдзармæ чи цæуы, ахæм дохтырты бригад. Прививкæтæ кæнынц куыстуæтты дæр. Препарат æрбаласынц уазалгæнæн камерæйы. Вакцинæйæн хъæуы ныллæг температурæ. Кæй фæнды вакцинаци скæнын, уыдонæн сæ бон у поликлиникæйы регистратурæты, кæнæ та «Паддзахадон лæггæдты» порталы уылты курдиат арвитын.
Завод «Радуга»-йы кусы 200 адæймаджы. Уыдонæй дыууын фондзы бафæндыд коронавирусæй сæхи бахъахъхъæнын æмæ прививкæтæ скæнын. Вакцинаци тагъд скæнынмæ сын баххуыс кодта медицинон кусджыты бригад. Терапевттæ пациенттæн скодтой æнæмæнг медицинон æркаст, баххæст кодтой анкетæтæ. Зæгъын хъæуы уый, æмæ пандемийæйы рæстæг дæр ацы куыстуаты архайд нæ баурæдта.
Коронавирусы ныхмæ тох кæныны мобилон къорд кусы республикæйы тар низы ныхмæ диспансеры дæр. 20 дохтыры ныридæгæн ацыдысты вакцинаци. Се хсæн медицинон куыстуаты сæйраг дохтыр Кобесты Николай. Чи скодта прививкæтæ, уыдон се ппæт дæр сæхи æнкъарынц хорз. Æвзæрырдæм сыл нæ фæзынди вакцинæ. Æртæ къуырийы фæстæ мобилон къорд скæндзæн вакцинацийы дыккаг къæпхæн. Республикæйы абоны онг прививкæтæ скодтой 5 мин адæймагæй фылдæрæй. Дохтырты мобилон къордтæ дарддæр кусынц цæрджытимæ. Абонæй фæстæмæ прививкæтæ кæнын райдайдзысты студенттæн, ахуыргæнджытæн æмæ социалон лæггæдты организациты кусджытæн.
