Арæзт æрцæудзæн республикæйы аивæдты лицейы, федералон проект «Придумано в России» æххæст кæнгæйæ, Уæрæсейы культурæйы Министрады æххуысæй
Креативон индустрияты скъола ацы аз байгом уыдзæн Цæгат Ирыстоны. Арæзт æрцæудзæн республикæйы аивæдты лицейы, федералон проект «Придумано в России» æххæст кæнгæйæ, Уæрæсейы культурæйы Министрады æххуысæй. Проектыл æрныхас кодтой, Дзанайты Барисы разамындæй æмбырды. Архайдтой дзы вице-премьер Платы Альбинæ, культурæйы министр Фидараты Сослан, аивæдты лицейы директор Ходы Фатимæ æмæ æндæр бæрнон кусджытæ. Скъола суыдзæн уæлæмхасæн ахуырады фæз, 5-11-æм кълæсты ахуырдзаутæн. Нысан кæнынц сæрмагонд студитæ байгом кæнын: звукорежиссертæн, къамисджытæн, видео, дизайн æмæ электрон музыкæйæн. Ахуыры фыццаг аз сфæлдыстадон фæзы уыдзæн 80 адæймаджы. Педагогты хуызы сын уыдзысты креативон индустрияты алы къабæзты минæвæрттæ. Æмбырды архайджытæ ма æркастысты «фæндаггон картæмæ». Сфæлдыстадон студитæ сифтонг кæндзысты нырыккон кусæнгæрзтæй. Стыр æргом ма аздæхтой Беслæны терроризмы ныхмæ культурон-патриотон центры сæрмагонд экспозици саразынмæ. Æрдзырдтой ма «Пушкины картæ»-йы архайдыл дæр.
