Дзæуджыхъæуккаг артисттæ сæ хуыздæр постановкæтæ равдыстой Новороссийскы, Геленджикы æмæ Кабардинкæйы зындгонд Зæронд парчы Театры
Кубаны кæронмæ æрхæццæ сты Евгений Вахтанговы номыл Академион Уырыссаг театры гастрольтæ. Ирд спектакльтæ, сæдæгай аивадуарзджытæ. Дзæуджыхъæуккаг артисттæ сæ хуыздæр постановкæтæ равдыстой Новороссийскы, Геленджикы æмæ Кабардинкæйы зындгонд Зæронд парчы Театры. Уæлдай тынгдæр адæмы зæрдæмæ фæцыд, Цагарелийы классикон пьесæйы уацмысмæ гæсгæ æвæрд, музыкалон комеди «Ханума». Равдыстой йæ Новороссийскы театры æмæ Геленджикы культурæйы Галуаны. Геленджикы сæргълæууæджы фыццаг хæдивæг Марина Рыбалкина куыд загъта, афтæмæй цæгатирыстойнаг «Ханума» сси егъау культурон мадзал сæ горæты царды. Вахтанговонты балц, æмтгæй райсгæйæ дæр, рауад æнтыстджын. Дыууæрдæм гастрольты фæтк у хорз традициты бындур. Ацы аз уалдзæджы Кабардинкæйы Зæронд парчы Театры труппæ Дзæуджыхъæуы равдыста спектакльтæ «Земской доктор» Михаил Булгаковы уацмысмæ гæсгæ, стæй Михаил Задорновы пьесæмæ гæсгæ спектакль «Последняя попытка».
