Скъоладзаутæн æмæ студенттæн семинар-тренинг бацæттæ кодта национ политикæйы æмæ æддагон бастдзинæдты Министрад
Куыд ахсджиаг у культурæ æмæ традицитæ бахъахъхъæнын, ууыл ныхас цыд Мæздæджы Уæлахизы Парчы. Скъоладзаутæн æмæ студенттæн семинар-тренинг бацæттæ кодта национ политикæйы æмæ æддагон бастдзинæдты Министрад. Спикертæ уыдысты æхсæнадон организациты, стæй национ-культурон æхсæнадты минæвæрттæ. Мæздæджы хæлардзинады Хæдзары кусынц 14 национ-культурон æхсæнады. Се ппæт дæр сты, Мæздæджы районы чи цæры, уыцы адæмы хæттыты минæвæрттæ. Фембæлды архайджытæн раарфæ кæнынмæ æрбацыд национ политикæйы æмæ æддагон бастдзинæдты министр Бæгъиаты Алан. Куыд загъта, афтæмæй ахсджиаг у, нæ фыдæлтæ нын кæй ныууагътой, уыцы æгъдæуттæ æмæ традицитæ, стæй нæ адæмы истори кæстæр фæлтæрмæ хæццæ кæнын. Хæлардзинады хæдзар бацæттæ кодта национ уæлæдарæсы ирд равдыст. Алы костюм дæр æвдисæг уыд йæ адæмы уникалон традицитæн æмæ историйæн. Уазджытæ цымыдисæй кастысты экспонаттæм æмæ истой сæ къамтæ. Уымæй дарддæр ма адæмæн фадат уыд салдаты касæй æмæ сæлдæгæй ацходынæн. Мадзал сси хæлардзинады, стæй национ традицитæн кад кæныны æцæг бæрæгбон.
