Цхинвалы æрæмбырд сты медицинон кусджытæ, социалон педагогтæ æмæ психологтæ.
Куыд ис баххуыс кæнæн хæст ферох кæнынæн. Цхинвалы æрæмбырд сты медицинон кусджытæ, социалон педагогтæ æмæ психологтæ.
Иууылдæр иумæ æрныхас кодтой адæмæн æмбæлгæ æххуыс бакæныныл. Уæлдайдæр та – профилон специалисттыл чи не ууæнды, уыдонæн. 2008-æм азы августы цаутæ судзгæ фæд ныууагътой алы бинонты дæр. Медицинон иртæстытæм гæсгæ æрыгон адæмæн сæ фылдæр хъыгдард баййæфтой эмоционалон æгъдауæй. Уымæй дарддæр рæзы, зæрдæйы, тугдадзинты æмæ туджы æлхъывдады низтæй чи хъæрзы, ахæм адæмы нымæц дæр. Рæвдауæндæтты хистæр къордты сабитæ та ныры онг нæ сахуыр сты дзурыныл, суанг ма мыртæ дæр нæ дзурынц. Ахсджиаг фембæлды рахастой цалдæр уынаффæйы. Горæты раздæры фыццæгæм поликлиникæйы хæстæгдæр рæстæг байгом уыдзæн консультацион кабинет. Скъолайы программæмæ та бахæсдзысты психологийы урок.
