Хицауады сæрдары фыццаг хæдивæгæй нысангонд æрцыди Сæбæтхъуаты Æхсарбег. Раздæр уыди компаниты къорд «Бавари»-йы генералон директор. Хицауады сæрдары хæдивæг, республикæйы æххæстбарджын минæвар УФ-йы президенты цур сси Дзанайты Барис.
Куыд ма уын хъусын кодтам, афтæмæй Цæгат Ирыстоны Сæргълæууæг Битарты Вячеславы бардзырдмæ гæсгæ Хицауады æрцыди ивддзинæдтæ.
Хицауады сæрдары фыццаг хæдивæгæй нысангонд æрцыди Сæбæтхъуаты Æхсарбег. Раздæр уыди компаниты къорд «Бавари»-йы генералон директор. Хицауады сæрдары хæдивæг, республикæйы æххæстбарджын минæвар УФ-йы президенты цур сси Дзанайты Барис. Хицауады сæрдары хæдивæг Томайты Ирбег, раздæр ацы бынаты хæстæ æххæст кодта рæстæгмæ. Ноджыдæр ма иу хæдивæг хицауады сæрдарæн сси Фадзайты Æхсарбег. Министрты кабинеты ног бынат радтой Анатолий Поляковæн. Йæ цæст дардзæн Мæздæджы районы рæзтмæ. Раздæр уыди фермерон хæдзарад «Тетцоев»-ы сæрдары хæдивæг. Æрдзон æвæрæнты æмæ экологийы министры хæстæ рæстæгмæ æххæст кæндзæн Мамиаты Чермен.
Республикæйы сæргълæууæджы уынаффæмæ гæсгæ, арæзтад æмæ архитектурæйы министрæй нысангонд æрцыди Икъаты Русланбег. Æнæниздзинадхъахъхъæнынады министр Михаил Ратманов. Культурæйы министрадæн разамынд дæтдзæн Сихъоты Тимур. Ныры онг уыди паддзахадон ансамбль «Алан»-ы аивадон разамонæг. Цæрæнуæтты-коммуналон хæдзарады, артаджы æмæ энергетикæйы министры бынат бацахста Сохъуырты Альберт. Паддзахадон исбоны æмæ зæххы ахастдзинæдты министр уыдзæн Тедеты Руслан. Нырмæ йæ хæстæ æххæст кодта рæстæгмæ.
Республикæйы сæйраг министрадтæй иу, экономикæйы райрæзты министрады сæргъы æрлæууыд Томайты Хъазыбег. Национ ахастдзинæдты фарстаты фæдыл министрæй нысангонд æрцыди Цуциты Аслан. 7 азы куыста ЦИПУ-йы историон факультеты деканæй. Ахуырады æмæ наукæйы министры хæстæ уал æххæст кæндзæни Иринæ Азимова. Амæй размæ уыди Рахизфарсы районы муниципалон сконды цæстдарæн-нымайæн палатæйы сæрдар.
Финансты министрады разамонæг, республикæйы сæргълæууæджы уынаффæмæ гæсгæ дарддæр æххæст кæндзæн Исахъты Олег.
Мыхуыры æмæ дзыллон коммуникациты комитеты сæрдарæй снысан кодтой Дзгойты Ольгæйы. Нырмæ уыди ПТРК-Аланийы информацион службæйы шеф-редактор. Паддзахады хардзæй цы æлхæд цæуы, уымæн дзуаппдæттæг управленийæн разамынд дæтдзæни Илаты Олег.
Карз нозт æмæ спъирт кæмæ хæццæ кæны, ахæм продукцийы рауагъдадмæ цæстдарды управленийы разамонæг сси Хидирты Батрадз. Информацион технологиты æмæ бастдзинады управленийы разамонæджы бынат бабар кодтой Дмитрий Шадянæн. Раздæр разамонæджы бынæттæ ахста коммерцион структурæты.
