Æнæ донæй баззадысты 500 адæймаджы
Къуыри размæ Буронмæ хæстæг цы зæй æрцыд, уый ныппырх кодта Лабагомы суадоны каптаж. Æнæ донæй баззадысты 500 адæймаджы. Хъæуы цæрджытæ пайда кæнынц ласгæ донæй. Нуазынæн бæззы. Ласынц æй бæлвырд фæткмæ гæсгæ – бон 3 хатты. Фæлæ уый фаг нæу. Доны системæ сног кæныныл куыд архайынц, уый тыххæй радзурдзæн Хъайтмазты Дзерассæ.
Дзиуаты Руслан дзуры, дон кæй нæ вæййы, ууыл ахуыр сты. Къæвдаты тыххæй зæйтæ арæх æрцæуынц. Уый аххосæй Лабагомы суадонæй хъæумæ цы дондзæуæн цæуы, уый байдзаг вæййы кæнæ та фехæлы. Буроны цæрджыты ныхæстæм гæсгæ, къранты дон нуазæн нæй, арæх фæцæуы змисæмхæццæйæ.
Дзиуаты Руслан: «Афтид ацы аз нæу. Иу 4 азы афтæ у. Уæлæ къæдзæх уынут, цас дзы ракалдис, ком иууылдæр у дзаг. Гыццыл къæвда дæр куы рацæуы, уæд дон фæцæуы сау-сауидæй, чъизийæ, нуазæн æй нæй. Машинæтæ кæмæ ис, уыдон Нузалæй ласынц. Мæнæн дæр æрбаласынц. Сæхицæн ласынц».
Буроны цæрджытæ ма æнæ донæй цас уыдзысты, уый нырма бæрæг нæу. Ламидæттæ æмæ дуртæ ныппырх кодтой доны хæтæлтæ 200 метры бæрц. Ам рад хæссы донласæг машинæ, фæлæ уый фаг нæу.
Зæй ныппырх кодта суадоны каптаж. Уый тыххæй Алагиры районы 10 июны снысан кодтой æнæнхъæлæджы уавæры фæтк. Администрацийы уайтагъд бацæттæ кодтой куыстытæ райдайынæн цы хъæуы, уый. Дондæттæг куыстуаты специалисттæ райдыдтой архайын. Бульдозертæ ссыгъдæг кодтой дæлстанцæмæ фæндаг.
Мæрзойты Анатолий, подрядон организацийы мастер: 3 боны дзы цыд сыгъдæггæнæн куыст, цæмæй адæмæн сæ бон кусын уа, уый тыххæй. Ныры онг сæвæрдтам 200 метры доны хæтæлтæ. Абоны бон доисæн каптаж æмбырдгонд æрцыд. Конд куы æрцæуа, уæд ма хъæудзæн иу бон, цæмæй адæмæн дон радтæм æмæ сын фенцондæр уа, уый тыххæй».
Къуырийы кæрон дон ратдзысты тесты хуызы, сбæлвырд кæндзысты системæйы архайд. Уæвгæ, Буроны цæрджытæ куыд зæгъынц, афтæмæй уый у рæстæгмæ фæрæз – цалынмæ иннæ зæй æрцæуа, уæдмæ. Сæ ныхæстæм гæсгæ, уавæр аивдзæн, æрмæстдæр хæтæлтæ ног суадонмæ куы бауадзой, уæд.
