Республикæйы ацы къордмæ чи хауы, ахæм инвалидтæ сты 2 минæй фылдæр
Куырм æмæ æвзæр чи уыны, уыцы адæмæн æххуысы гæнæнтыл æрныхас кодтой «Иугонд Уæрæсе»-йы исæнуаты. Республикæйы ацы къордмæ чи хауы, ахæм инвалидтæ сты 2 минæй фылдæр. Фембæлды архайдтой Парламенты социалон политикæйы, æнæниздзинадхъахъхъæнынады æмæ ветеранты хъуыддæгты фæдыл комитеты сæрдар Реуазты Ларисæ, æнæниздзинадхъахъхъæнынады, ахуырады æмæ наукæйы министрадты, адæмæн куыст дæттыны комитеты æмæ æхсæнадон организациты минæвæрттæ. Сæрмагондæй æрдзырдтой, инвалидтæн æнцонвадат архайды, æмæ сæ куысты бынæттæй æххæст кæныны фарстатыл. Æмбырды архайджытæ бахастой, сæрмагонд анкетæйыл бакусыны фæндон, æмæ афтæмæй сбæрæг кæнын, се нæниздзинад хъыгдард кæмæн у, уыцы адæмы цавæр куыст хъæуы, æмæ сын курсытæ саразын. Куырмыты æхсæнады разамонæг Гæтциты Батраз радзырдта сæ дæлхайады куыстуаты уæззау уавæры тыххæй. Цæттæ дзы кæнынц базтæ æмæ хуыссæн гæрзтæ. Фарста алыг кæнынæн æххуыс уаид паддзахадон куыстуæттимæ контракттæ бафыссын. Æмбырды цы фæндонтæ снысан кодтой, уыдон суыдзысты куырм æмæ æвзæр чи уыны, уыцы адæмæн æххуысы мадзæлтты пъланы бындур.
