Арæзтад райдыдта фарон. Ныридæгæн фесты куыстыты фылдæр хай
Куырттаты 2027-æм азы хъуамæ байгом уа сывæллæтты рæвдауæндон. Арæзтад райдыдта фарон. Ныридæгæн фесты куыстыты фылдæр хай. Хъæуы ныры онг сывæллæтты рæвдауæндон никуы уыд. Уымæ гæсгæ йын ис стыр нысаниуæг. Бæлвырддæр хабæрттæ радзурдзæн Чехойты Фатимæ.
Арæзтад фарон райдыдта. Ныртæккæ кæронмæ æрхæццæ сты бæстыхайы æппæт монолитон куыстытæ, уæладзгуыты *хсæн асинтæй фæстæмæ. Специалисттæ фæвæййынц æддаг къултæ агуыридурæй аивгонд. Дарддæр бавналдзысты инженерон хызтæ фидар кæнынмæ æмæ агъуыстыты мидæггаг куыстытæм. Бæстыхайы амайынц хицæнгæнæн къултæ, уымæй уæлдай æххæст кæнынц цæттæгæнæн куыстытæ асинтæ *вæрынæн.
Куырттаты ацы объектæн ис сæрмагонд нысаниуæг. Хъæуы ныры онг дзы рæвдауæндон нæ уыд. Уый аххосæй ныййарджытæ сæ сывæллæтты ластой Горæтгæрон районы иннæ хъæутæм. Ног рæвдауæндоны уыдзæн 120 бынаты. Дыууæуæладзыгон бæстыхайы сифтонг кæндзысты ахуыр кæнынæн æмæ хъазынæн агъуыстытæ, фæлладуадзæн фæзтæ, административон кабинеттæ æмæ медицинон пункт. Проектмæ гæсгæ дзы уыдзæн нырыккон хæринаггæнæн, музыкалон æмæ спортивон залтæ. Афтæмæй сывæллæтты рæзтæн æмæ хъомыладæн арæзт æрцæудзысты æнцонвадат уавæртæ.
Сæйраг бæстыхайæ уæлдай территорийы ис модулон хъармгæнæн æмæ хи сыгъдæггæнæнтæ. Уыдоны руаджы рæвдауæндоны куыст цæудзæн æнæкъуылымпыйæ. Территорийы фæзындзæн æдасæй хъазынæн æмæ тезгъо кæнынæн фæзтæ. Арæзтад цæуы национ проект «Бинонтæ» æххæстгæнгæйæ. Рæвдауæндон цæттæ уыдзæн 2027-æм азы. Подрядон куыстуаты минæвары ныхæстæм гæсгæ, арæзтадон куыстытæ цæуынц фæткæй раздæр. Уый та фадат дæтты рæвдауæндоны дуæрттæ ацы аз байгом кæнынæн.
