10 боны дæргъы дзы сывæллæттæ исдзысты зонындзинæдтæ математикæйæ, физикæйæ, информатикæйæ æмæ робототехникæйæ. Арæзт сын цæудзысты тренингтæ, лекцитæ, дæсныйадæвдисæг ахуыртæ.
Иу бонмæ презентаци бацæттæ кæнын æнцон нæу. Фæлæ 6 командæйы дæр ацы хæслæвæрд хорз сæххæст кодтой. Сæрдыгон скъолайы саразджыты ныхæстæм гæсгæ афтæ цыбыр рæстæг сын барæй лæвæрд æрцыд. Афтæмæй кæрæдзиимæ тагъддæр фæлымæн уыдзысты. Командæ «Evenav» бацæттæ кодта сæрмагонд плакат æмæ кафт.
Хæбæлаты Дианæ: «Нæ йæ зыдтам чи кæимæ уыдзæн. Цæттæ кæнынæн нын уыд чысыл рæстæг. Бирæ фæбадтыстæм. Уый фæрцы кæрæдзийы базыдтам, фæзындис нын ног æмбæлттæ. Тынг æхсызгон кæй ссардтам ахæм æмбæлттæ, æмæ кæй æрцыдыстæм ардæм».
Æлборты Элинæ сæрдыгон скъолайы фыццаг хатт ис. Æрбацыд Хуссар Ирыстонæй. Уым скъолайы олимпиадæйы информатикæйæ сси уæлахиздзау, æмæ уымæ гæсгæ æрвыст æрцыд ардæм.
Æлборты Элинæ: «Æз ацы скъоламæ æрцыдтæн фыццаг хатт. Мæ зæрдæмæ дзы тынг фæцыдис. Кæд æмæ дзы стæм æрмæстдæр 2 боны, уæддæр тынг цæуы нæ зæрдæмæ скъолайы».
Сæрдыгон скъола республикæйы байгом 9-æм хатт. Арæзт æрцæуы Хуссар математикон институты, Дзæуджыхъæуы математикон ахуырады центры æмæ фæсивæды хъуыддæгты, физкультурæ æмæ спорты министрады хъæппæрисæй. Скъолайы сывæллæттæн амонынц математикæйæ, физикæйæ, информатикæйæ æмæ робототехникæйæ зонындзинæдтæ.
Вера Абатурова, скъолайы разамонæг, Дзæуджыхъæуы математикон ахуырады центры директор: «Скъолайы сæйраг нысан у, сывæллæтты зонындзинæдтæ парахатдæр кæнын, сразæнгард сæ кæнын наукæйæ архайынмæ. Ам сæ ахуыр кæнæм командæйы кусыныл, хистæртимæ, æмгæрттимæ æмæ кæстæртимæ раст дзурыныл».
Ацы аз скъолайы архайын кæй фæндыд, уыдоны нымæц уыд бирæ. Фæлæ форумы фадæттæ куыд амонынц, уымæ гæсгæ æвзæрст æрцыд 30 скъоладзауы. Уыдон сты Мæскуыйæ, Новосибирскæй, Хуссар æмæ Цæгат Ирыстонæй.
10 боны дæргъы сæрдыгон скъолайы архайджытæн арæзт цæудзысты тренингтæ, лекцитæ, дæсныйад æвдисæг ахуыртæ. Кæронбæттæны сывæллæттæ бацæттæ кæндзысты электрон хуызы хатдзæгтæ. Равæрдзысты сæ Дзæуджыхъæуы математикон ахуырады центры сайты.
Хъайтмазты Дзерассæ
