Афтæмæй æххуыс кæны тыхст уавæры чи бахауди, уыдонæн
Коронавирусы пандемийæ зындзинæдтæ æвзæрын кæны чысыл æмæ астæуккаг бизнесæн. Сæвзæрд уавæрæй ныридæгæн бирæ амалхъом адæм тыхсынц. Тæссаг у, æгуыст адæмы нымæц куы сырæза, уымæй. Куыст дæттыны службæ рахызти дистанцион куысты фæткмæ. Афтæмæй æххуыс кæны тыхст уавæры чи бахауди, уыдонæн.
Акъоты Маратæн йæ бизнесы къуылымпыдзинæдтæ райдыдтой Уæрæсе æмæ Китайы арæнтæ æхгæд куы æрцыдысты, уæд. Ис æм гыццыл дукани æмæ йæ товарæй ифтонг кодта уырдыгæй. Гæнæн ис, æмæ пандемийæйы тыххæй амалхъом адæймаг йæ дукани сæхгæндзæн, фæлæ кæдмæ, уый бæрæг нæй.
Ныр къуылымпыдзинæдтæ уыдзæни арендæйæн æмæ хъалонтæ фидыны хъуыддаджы дæр. Фæлæ, сæйрагдæр та у – куысджыты уавæр. Дуканийы кусы дыууæ адæймаджы. Мызд сын куыд хъуамæ фида, йæ бизнес сæхгæнын уал æй куы бахъæуа, уæд. Æмæ ахæм уавæры сты бирæтæ. Республикæйы куыстдæттыны комитет архайы, цæмæй коронавирусы аххосæй æгуыст адæмы нымæц ма сбирæ уа. Зæгъын хъæуы уый, æмæ уал ныртæккæ бизнесы æмæ фæллойы базарады уавæр æвзæр нæу.
Фыццаградон хæс у, республикæйы æгуыст адæмы фиддонтæ ма фæкъаддæр кæнын. Президенты уынаффæмæ гæсгæ, фиддонты æппын фылдæр бæрц схиздзæни 12 мин соммæ. Фæлæ уыцы æхца æххæстæй нæ исдзысты. Фиддзысты сæ æрмæстдæр, нырмæ 8 минæй 11 мин соммæ чи иста, стæй, хæстæгдæр рæстæг сæ куыстæй кæй суæгъд кæной, уыдонæн. Цæмæй ацы къорды адæм сæ фиддонтæ афоныл райсой, уый тыххæй сæ хъæуы куыд гæнæн ис, афтæ тагъддæр бацæуын комитеты сайтмæ, æмæ хыгъды слæууын.
Цы документтæ дзы хъæуы бацæттæ кæнын, уыдон дæр амынд сты, куыстуаты сæрмагонд сайты. Фарстатæ ма кæмæ сæвзæра, уыдонæн кусы комкоммæ телефон. Интернетæй спайда кæныны фадат кæмæн нæй, уыдоны бон та у, сæ куырдиæттæ ныппарын куыстдæттыны центры хайæдты цур цы контейнертæ æвæрд ис, уыдоны.
