Фыццаг цех Дзæуджыхъæуы байгом 2022-æм азы, бон дзы кусы 2 цехы, цæттæ ма кæнынц иу
Промышленнон хъуыддаг нæ республикæйы рæзы. «БТК групп»-ы сæрмагонд уæлæдарæс хуыйыны куыстуаты ис æхæхст цикл. Фабрикæйы фыццаг цех Дзæуджыхъæуы байгом 2022-æм азы июлы. Абон дзы кусы 2 цехы, цæттæ ма кæнынц иу. Ныртæккæ фабрикæйы фæллой кæны 170 адæймаджы. Æдзухдæр практикæмæ æрбацæуынц профилон училищæты студенттæ. Куыстуат бабæрæг кодта республикæйы сæргълæууæг Сергей Меняйло.
Компани «БТК Групп»-ы хуыйæн фабрикæ ахадгæйæ кусы. Ам ис æххæст цикл – кæрдынæй цæттæ дзаумæттыл бакуысты онг, тыхджын хъомыстæ æмæ заказтæй æххæст. Республикæйы сæргълæууæг куыстуат бабæрæг кодта æмæ базонгæ йæ архайдимæ. Сергей Меняйло куыд загъта, афтæмæй ацы инвестицион проекты хъуыды сæвзæрд Боллоты Таймуразимæ фембæлды рæстæг Санкт-Петербурджы экономикон форумы.
Компани «БТК Групп» фæзынд 2007-æм азы. 16 азмæ Уæрæсейы йæ кусæн фæзты географи апарахат Санкт-Петербургæй ТывАйы онг, фабрикæтæ фæзынд Хуссар Ирыстоны æмæ Белоруссийы. 6 мин æмæ 500 адæймаджы райстой куысты бынæттæ, рог промышленносты та «БТК Групп» ахсы раззагдæр позицитæ. Бизнесы алы къабæзтæн сæрмагонд уæлæдарæс цæттæ кæныны стырдæр уæрæсейаг компани бацыд Уæрæсейы Хицауады системæаразæг куыстуæтты хыгъдмæ.
Весеннийы уынджы телефонты раздæры автоматикон станцæйы бынаты куыстуат байгом 2022-æм азы. Йæ хъомыс дæтты, кусджыты штат фæфылдæр кæныны фадат – фабрикæйы ис 100 вакансийæ фылдæр. Гæнæн ис куыстмæ бацæуын, фæлтæрддзинад кæмæ нæй, уыдонæн дæр. Кæй фæнды, уыдонæн арæзт цæуынц ахуырадон курсытæ. Уым сæ бон уыдзæн стипенди исын дæр.
Хаст ма æрцыд иу ахсджиаг уынаффæ. Дæрддзæф районты цæрджытæй фабрикæйы кусын кæй фæнды, уыдонæн самал кæндзысты лæвар транспорт. Ныртæккæ хуыйæн фабрикæйы кусы 2 цехы, цæттæ ма кæнынц ноджыдæр иу.
