Уый тыххæй журналисттæн фехъусын кодта комплексы разамонæг Виталий Иванов
Куыстуат «Россети Северный Кавказ» 1 миллиард сомы радих кæндзæн нæ республикæйы электрон тыхдæттæг системæйы рæзтæн. Уый тыххæй журналисттæн фехъусын кодта комплексы разамонæг Виталий Иванов. Цæгат Кавказы сæйраг энергетик дзыллон информацийы фæрæзты минæвæрттæн радзырдта къабазы ног рæзты гæнæнты тыххæй. Ахсджиаг хъуыддаг у – «Россети»-йы бындурыл æппæт муниципалон, æмæ хицау кæмæн нæй, уыцы объекттæ баиу кæнын. Цæгат Ирыстон хаст æрцыд, ахæм куыст активонæй кæм кæнынц, уыцы регионты хыгъдмæ. Виталий Иванов ма куыд загъта, афтæмæй нæ республикæйы хицауады рдыгæй ис æмбарынад, ацы ногдзинад электрон тых фæстауæрц кæнынæн фадат кæй ратдзæн, уый. Зæгъын ма хъæуы уый дæр, æмæ Цæгат Ирыстонмæ инвестицитæ кæй цæуынц æнæтарифон куыстуæтты рдыгæй. Фæрæзтæ цæудзысты федералон бюджетæй. Цæгат Кавказы регионты хсæн электрон тых уарæг компани сæ схардз кæндзæн электрон тыхæй ифтонггæнæн системæйы рацарæзтыл. Стыр æргом ма аздахдзæн хæрдзтæ фæкъаддæр кæнынмæ. Уымæй дарддæр ма Виталий Иванов загъта, ахсджиаг кæй у персоналимæ æнгомдæр кусын. Ныры онг кусджыты фылдæр хаймæ нæй сæрмагонд ахуырад, æмæ уавæр хъæуы ивын.
