Чидæртæ та бæрæгбон æнæхъæн сыхæй сбæрæг кодтой
Лæгты дзуармæ кувæн къуырийы алы бонæн дæр ис йæхи нысаниуæг. Ирыстоны цæрджытæн сæ фылдæр сæ хæдзæртты скуывтой знон. Чидæртæ та бæрæгбон æнæхъæн сыхæй сбæрæг кодтой. Уымæн æмæ уыд фæлладуадзæн бон. Ахæм уынаффæ хаст æрцыд фарон, Иры Стыр ныхасы æмæ Парламенты хъæппæрисмæ гæсгæ. Сфидар æй кодта республикæйы сæргълæууæг Битарты Вячеслав. Куыд бацæттæ кодтой сæйрагдæр национ бæрæгбонмæ горæты цæрджытæ, уый тыххæй радзурдзæн Томайты Батраз.
Чысыл рæстæг æмæ нывонд стуры дзидза уыдзан цæттæ. Аджы фарсма та къæбиц, уым фыцынц чъиритæ. Æнæмæнгæй, бæрæгбоны фынг сфидаудзæн æртæ æртæдзыхонæй дæр. Къæбицы хистæр абон у Айларты Эльвирæ. Сыхæгты ныхæстæм гæсгæ йæ уæлибæхтæ æппынæдзухдæр вæййынц дзаджджын æмæ хæрзад.
Сыхбæсты хсæн алы хатт дæр вæййы «Аланийы» футболон клубы капитан Цæрикъаты Тарас. Хъæлдзæг спортивон ерысты чи рамбылдта, уыцы сывæллæттæн ракодта зæрдылдарæн лæвæрттæ. Фæлæ йæ раздæр куы зыдтаин, уæд лæвæрттæ ноджы бæркадджындæр уыдаиккой, зæгъы зындгонд футболист.
Хистæрты уæлхъус алы хæтт дæр æрлæууынц сæ кæстæртæ. Уымæн æмæ хъуамæ зоной нæ рагон æгъдæуттæ æмæ традицитæ. Афарстам сæ мах дæр, бæрæгбон кæй номыл у, уый зонут, зæгъгæ.
Æнæхъæн къуыри республикайы цæрджытæ кувдзысты Стыр Хуыцаумæ æмæ Уастырджимæ, цæмæй сæ хæдзæртты уа фарн, амонд æмæ бæркад. Кæрæдзимæ цæудзысты уазæгуаты, æмæ лæвар кæндзысты цины нкъарæнтæ.
