Ахуыр кодтой ирон æвзаг, цыдысты туристон балцыты æмæ цæттæ кодтой национ хæринæгтæ
Лагерь «Хохаджы» кæронмæ æрхæццæ лингвистикон-ахуырадон фæлтæры куыст. 35 лæппуйы æмæ чызджы рæстæгмæ систы иу бинонтау. Ахуыр кодтой ирон æвзаг, цыдысты туристон балцыты æмæ цæттæ кодтой национ хæринæгтæ. Æрыгон фæлтæры минæвæрттæ се нкъарæнтæ раргом кодтой не сфæлдыстадон къордæн, æмæ бæлвырддæр хабæрттæ радзурдзæн Тъехты Элинæ.
12 аздзыд чызг Плиты Аминæ фæлладуадзæн лагерьты вæййы алы аз. Фæлæ «Хохаг»-ы фыццаг хатт и. Куыд зæгъы, афтæмæй ацы сæрд ын уæлдай цымыдисагдæр у. Фæзынд ын ног æмбæлттæ æмæ бирæ ногдзинæдтæ. Ам сывæллæтты ахуыр кæнынц хуыйын æмæ ирон чъиритæ кæнын. Уыцы зонындзинæдтæ сын сты пайдайаг.
Фæлтæр сæхгæдтой национ æууæлтимæ. Сывæллæттæ æртæ къуырийы ахуыр кодтой сæ Райгуырæн бæстæйы истори, традицитæ æмæ æгъдæуттæ. Цы зонындзинæдтæ райстой, уыдонæй спайда кодтой.
Ирон бæгæны кæнын сæ ппæт нæ зонынц. Фæлæ традицион бæрæгбæтты ахсджиаг у дзидза раст сфыцын. Уыцы куыст бабар кæнынц лæппутæ. Базыдтой табуйаг цы хæйттæ сты, радзырдтой физонæг цы у, уый тыххæй дæр.
Нæ рагфыдæлты цардыуаг цæмæй хуыздæр базоной, уый тыххæй сывæллæттæн кодтой экскурситæ, цыдысты хæхтæм. Суанг ма фатæй æхсын дæр сæ ахуыр кодтой. Зæххытæ иртасын æмæ туризм сты лагеры сæйраг лингвистикон-ахуырадон фæзилæнтæ.
Касаты Аслæнбег, лагерь «Хохаг»-ы сæргълæууæг: «Æрвылаз нæ республикæйы байгом вæййынц хи ирхæфсæн лагерьтæ. Уыдонимæ лагерь «Хохаг» дæр райдыдта йæ куыст. Лагеры бындурыл ныридæгæн дыккаг хатт цæуы æвзаг зонынадæн ахуырадон программæ. Ирон æвзаг цы сывæллæттæ нæ зонынц, ахæмты нæм æрбарвыстой 18 бонмæ. Ахуыр сæ кодтам ирондзинадыл, ирон æвзаджы æмæ æгъдæутты сусæгдзинæдтыл. Чызджытæ æмæ лæппутæ уыдон куы зоной, уæд хæдзары дæр цымыдис кæндзысты æмæ хистæрты фæрсдзысты. Ома, сывæллæттæн бындур ратдзыстæм. Кæй зæгъын æй хъæуы, 18 боны бирæ не сты. Мæ хъуыдымæ гæсгæ, ахæм лагерь хъуамæ афæдзы дæргъы дыууæ хатты куса».
Сменæйы æдæппæтæй ис 35 скъоладзауы. 3 къуырийы сывæллæттæ æрмæст мадæлон æвзаг нæ ахуыр кодтой. Ныр алы сывæллон дæр зоны рагон ирайнагау нымайын. Сæрдыгон бонтæ лагерь «Хохаг»-ы æрвитын азæй-азмæ фылдæр адæмы фæфæнды. Фæлæ дзы ацы аз ис æрмæстдæр иу фæлтæр. Нæй йын сывæллæтты кæм исой, ахæм бынат. Фæлæ зæрдæ дарынц, иннæ аз лагеры бирæ сывæллæттæ кæй уыдзæн, ууыл. Зæгъынц, ахуырадон программæ цымыдисагдæр уыдзæн.
