Кæронбæттæны дзы уыд лингвистон къорд
Лагерь «Звездочка»-йы кадджын уавæры сæхгæдтой сæрдыгон дзæбæхгæнæн сезон. Кæронбæттæны дзы уыд лингвистон къорд. 18 боны дæргъы 35 лæппу æмæ чызджы, 7 азæй 14 азы онг, зонгæ кодтой райгуырæн бæстæйы историимæ, æгъдæуттимæ æмæ традицитимæ. Уазджытæн æмæ ныййарджытæн бацæттæ кодтой музыкалон æмæ кафæн номыртæ. Уæлдай зæрдæмæдзæугæ та рауад хъæлдзæг инсценирвкæ «Чызгæскъæфт хохаг хъæуы». Йæ фæстæ та патриотон мадзал. Баст уыд, Фыдыбæстæйы сæраппонд йæ цард чи радта, уыцы Гæздæнты авд æфсымæримæ. Лагеры сменæ фæуыны фæстæ, йæ архайджытæн традицимæ гæсгæ радтой сертификаттæ. Фæстæдæр та ныййарджытæ æмæ сывæллæттæ акодтой иумæйаг кафт, куыд фæлтæрты бастдзинады символ. Зæгъдзыстæм ма уый дæр, æмæ ацы аз лагеры сæ фæллад суагътой 5 фæлтæры. Алкæцыйы дæр фæйнæ 35 адæймаджы. Тематикон сменæты фæсивæдæн арæзт цыдысты дæсныйадæвдисæг ахуыртæ, тренингтæ æмæ конкурстæ, экскурситæ алы кæмттæм æмæ зæрдылдарæн бынæттæм.
