Мадзал арæзт æрцыд, национ проект «Демографи»-йы федералон проект «Спорт – царды нормæ» æххæст кæнгæйæ
150 архайæгæй фылдæр нæ бæстæйы 15 регионæй, хæстæг фæсарæнтæй æмæ Хуссар Ирыстонæй. Лескены кæронмæ æрхæццæ Уæрæсейы æппæтæй егъаудæр чемпионат практикон æхстытæй карабинæй. Мадзал арæзт æрцыд, национ проект «Демографи»-йы федералон проект «Спорт – царды нормæ» æххæст кæнгæйæ. Ерысты уæлахиздзаутæ бацæудзысты Уæрæсейы иугонд командæмæ практикон æхстытæй. Фидараты Маринæ радзурдзæн бæстондæр.
Бæлвырд, раст æмæ тагъд. Ахæм домæнтæ æххæст кодтой практикон æхстытæй Уæрæсейы чемпионаты архайыджытæ.
Ерысты архайджытæ æхсынц æрмæстдæр карабинæй, фæлæ хæцæнгарзæн ис бирæ хуызтæ æмæ мысантæ.
Хъырымæй Сахалины онг 150 адæймаджы ссыдысты Лескены полигонмæ. Алкæйы дæр фæндыд чемпион суæвын. 4 боны ерысы, 350 æхсты, 16 фæлтрæны. Алы фæлтæрæнæн дæр ис йæхи сæргонд. Фæлæ се ппæт дæр баст сты нарты кадджыты хъайтартимæ. Хъуыстысты Батразы, Донбеттыры, Сатанайы, Æфсатийы нæмттæ… Денис Дамдинов Ирыстонмæ ссыди Сахалинæй.
Ерыстæн сæрмагонд фæз цæттæ кодтой дæргъвæтин рæстæг æмæ бæлвырд. Чемпионат саразджытæ архайдтой ууыл, цæмæй ерысгæнджытæ сæ арæхстдзинад равдисой æххæстæй.
Ерыстæ бабæрæг кодтой республикæйы Сæргълæууæг Сергей Меняйло æмæ Уæрæсейы практикон æхстыты федерацийы президент Михаил Гущин. Уыдон стыр аргъ скодтой полигоны хæрзхъæддзинадæн æмæ спортсменты цæттæдзинадæн. Регионы разамонæг ма загъта, фидæны дæр Лескены полигоны ахæм ерыстæ аразын кæй фæнд кæнынц, уый.
Турниры стыр æргом аздæхтой æдасдзинады фарстатæм. Куыд архайджыты, афтæ, бакæсынмæ чи рбацыд, уыдоны. Сæйрагдæр уыд – бакусын ууыл, цæмæй иу адæймаг дæр æфхæрд ма баййафа.
Æппæтæй ахсджиагдæр тох. 8 хуыздæр спортсмены ерыс кодтой «Дуэль»-ы. Уый фæстæ спортсментæн равдыстой моно аудиоспектакль нарты кадджытæй. Стæй сын уæд лæвæрдтой хæрзиуджытæ. Спорстментæн хæрзиуджытæ кадджын уавæры радтой республикæйы Сæргълæууæг æмæ нæ бæстæйы практикон æхстыты федерацийы президент.
