Рæсугъддзинадмæ тырнын æнцон хъуыддаг у. Ахæм хъуыдыйыл хæст сты Мæздæджы районы Черноярскийы станицæйы культурæйы Хæдзары кусджытæ.
Ам ис нывкæнынады аивады секци «Арвæрдын». Цæуынц æм, дыууæ азы кæуыл сæххæст, уыдон æмæ хистæр кары сабитæ. Ахуыр сæ кæнынц ахорæнты хуызтæ иртасыныл, композицитæ уыныныл. Сывæллæттимæ кусы фæлтæрдджын ахуыргæнæг Наталья Фомина. Алкæмæ дæр сæ ссары фæндаг. Йæхæдæг куыд зæгъы, афтæмæй йын сæйрагдæр у алы сывæллоны курдиат дæр раргом кæнын. Аив куыст скæнынæн къорды уæнгтæ пайда кæнынц æрдзон æрмæгæй æмæ пластилинæй, ныв кæнынц алыхуызон ахорæнтæй. Архайынц аивады нырыккон хуызтæ фæлварыныл дæр. Цалдæр мæйы размæ райдыдтой пластилинæй нывкæнынады кусын. У нырыккон аивады хуыз, æмæ йæ бирæтæ бауарзтой. Черноярскийы станицæйы сывæллæтты куыстытæ сæмбырд кодтой иу альбомы. Чи зоны æмæ кæмæндæрты суыдзæн ног методикон æрмæг.
