9 декабры дунейы сбæрæг кодтой коррупциимæ тох кæныны бон. Уыцы бонмæ Мæздæджы районы паддзахадон автоинспекицийы кусджытæ æмæ районы цæрджытæ сарæзтой иумæйаг рейд.
Сæ хæс уыд барадхъахъхъæнджыты куыст бæрæг кæнын, сæрмагондæй пъæлицæ куыд кусы, уый. Куыд æмгуыст кæнынц алыхуызон службæтимæ æмæ адæмимæ.
Рейды архайджытæ уыдысты республикæйы мидхъуыддæгты министрады, Æхсæнадон палатæйы уæнгтæ æмæ барадхъахъхъæнджытæ. Сæ куысты цы зындзинæдтимæ æмбæлынц, уыдон сын æнæзонгæ не сты. Куыд зæгъынц, афтæмæй, арæх адæм, шофыртæ æмæ бæлццæттæ не ххæст кæнынц фæндæгтыл цæуыны æгъдæуттæ. Фæлæ уыцы иу рæстæг сæ рæдыдтытыл нæ фæсæттынц.
«Уый тыххæй та адæмимæ хъæуы профилактикон куыст кæнын» – зæгъынц Æхсæнадон палатæйы уæнгтæ. Ацы рейды дæр ныхас кодтой адæмимæ, стæй сын цыбыр рæстæгмæ бар радтой барадхъахъхъæнæг суæвынæн.
