Мæздæджы районы цæрджытæн, фæстаг 10 азмæ фæци, нæ эфирмæ кæсыны фадат. Знон дзы кусын райдыдта республикон телеуынынады видеосигнал. Мæздæджы районы цæрджытæ сæ
Мæздæджы районы цæрджытæн, фæстаг 10
азмæ фæци, нæ эфирмæ кæсыны фадат. Знон дзы кусын райдыдта республикон
телеуынынады видеосигнал. Мæздæджы районы цæрджытæ сæ хъаст Цæгат
Ирыстоны хицауады сæрдармæ куы бахастой, уæд хъуыддаг фæрæстмæ. Йæ
уынаффæмæ гæсгæ уавæр аивыныл бакуыстой республикæйы хицауад,
бастдзинады куыстуæттæ «Ростелеком», стæй радио æмæ телеуынынады
сигналдæттæг центр. Мæздæджы районы знон кусæг балцы уыд Хицауады Сæрдар
Такъоты Сергей. Бабæрæг кодта социалон объекттæ æмæ фембæлд районы
разамындимæ.
Республикæйы хицауады сæрдар Такъоты
Сергей Мæздæджы районы хæдзарад «Украина» бабæрæг кодта сæумæрайсом. Кæд
фæлладуадзæн бон уыд, уæддæр иууылдæр уыдысты сæ куысты. Æдæппæтæй дзы
фæллой кæны 220 адæймаджы. Хæдзарад у стыр, æмæ дзы кусинаг хъуыддæгтæ
дæр чысыл нæй. Мин гектарæй фылдæр зæххытæ, мин – стуртæ. Цæгат Кавказы
стырдæр хæдзарæдтæй иу хæрзхъæд продукцийæ æфсады Цæгат Ирыстоны æмæ
сыхаг регионты дæр.
Хæдзарады сæрдар Такъоты Сергейæн
равдыста цы продукци уадзынц, уый – æрмæст æхсырæй 12 хуызы. Ам суткæмæ
бакусынц 6 тонны æхсыр. Фылдæрыл дæр аххæсиккой, ног кусæнгæрзтæ сæ куы
уаид, уæд.
Хæдзарадæй Такъоты Сергей ацыд районы
рынчындонмæ. Федта мæздæггæгты æнæниздзинадмæ куыд кæсынц, уый.
Хæстæгдæр рæстæг дзы фæзындзæн компьютерон томогроф. Рынчынты ныр
сæдæгай километртæ цæуын нал хъæудзæн. Ратдзысты ма сын гемодиализы
аппарат дæр. Районы ис сæ уыргтæ сахъат кæмæн сты, æмæ æххуыс кæй хъæуы,
ахæм 17 цæрæджы.
Легкойты Артур, Мæздæджы районы
рынчындоны сæйраг дохтыр: «Программæмæ гæсгæ нын бирæ цæмæйдæрты баххуыс
кодтой. Афæдзы кæронмæ ма хъуамæ ноджыдæр райсæм медицинон
кусæнгæрзтæ».
Рынчындоны фæстаг рæстæг бирæ
хъуыддæгтыл бакуыстой, фæлæ ма лыггæнинаг фарстатæ дæр фаг. Фыццаджы дæр
хъæуы сывæллæтты инфекцион хайады арæзтад кæронмæ ахæццæ кæнын.
Рынчындоны хирургион хайад байгом 30 азы размæ. Уæдæй нырмæ цалцæггонд
никуы æрцыд. Мæздæджы районы бюджеты фæрæзтæ нæй. Уымæ гæсгæ сæ зæрдæ
дарынц республикæйы хицауадыл.
Бынæттон администрациты сæргълæуджытимæ
Такъоты Сергей йæ раныхас райдыдта фиппаинагæй. Йæ хъуыдымæ гæсгæ,
ахсджиаг фарстатыл бакусын арæх къуылымпы фæкæны документтæ раст конд
кæй нæ вæййынц, уый, кæнæ та нæ вæййынц æппындæр.
Уæвгæ та, районы æркæсинаг хъуыддæгтæ
чысыл нæй. Зæгъæм, Хъызлары нæй сывæллæтты рæвдауæндон. Премьер сын ныфс
бавæрдта, хæстæгдæр рæстæг хъæуы хи хæдзæрттæй иуæй рæвдауæндон кæй
сараздзысты, уый тыххæй. Фæрæзтæ йын ныридæгæн дихгонд æрцыд. Фидæнмæ
хорз хъуыдытæ ис амалхъомдзинады райрæзтæн дæр.
Фæндæгты арæзтад, куысты бынæттæ, санитарон уавæр-Такъоты Сергеймæ мæздæггæгтæ бирæ фæрстытæ лæвæрдтой.
Ацы фембæлды рæстæг ма æрцыд иу æхсызгон
цау. Амæй фæстæмæ Мæздæджы цæрджытæн фадат уыдзæн канал «Аланимæ»
кæсынæн. 10 азæй фылдæр районы бынæттон телеуынынад не вдыста.
Кæронбæттæны та хицауады сæрдар уыд тхеквондойы турниры. Уæлахиздзаутæн радта хæрзиуджытæ.
