филиал вгтрк государственная телерадиовещательная компания “Алания”

Мадæлон æвзаг бахъахъхъæныны тыххæй нæ республикæйы стыр куыст цæуы. Царды рауадзынц сæрмагонд программæтæ, фыссынц ног чингуытæ. Фæлæ уый фаг ахадгæ нæу. Цæгат Ирыстоны сæргълæууæджы цур цы къамис арæзт æрцыд, ирон æвзаг бахъахъхъæныны тыххæй, уый уæнгты хъуыдымæ гæсгæ, ацы фарстайыл кусын хъæуы иумæйагæй – бинонты, скъолаты, æхсæнады æмæ паддзахады.

Ирон филологийы факультеты рауагъдон Хортиты Маринæ мадæлон æвзаджы райрæзты проблемæтимæ хорз зонгæ у. Скъолайы педагогон практикæ куы цыдис, уæд федта рæзгæ фæлтæрæн ирон æвзаг ахуыр кæнын цымыдисаг кæй нæу, уый. Фæлæ уыцы зындзинæдтæ Маринæйы нæ тæрсын кæнынц. Ахуыргæнæджы дæсныйад кæй равзæрста, ууыл нæ фæсмон кæны. Йæ размæ æвæры стыр нысантæ.

Хортыты Маринæ, ЦИПУ-йы ирон филологийы факультеты рауагъдон: «Ацы факультетмæ бацыдтæн хибарæй ме скъолайы ахуыргæнæгмæ гæсгæ. Ныр фæвæййын, æмæ мæ фæнды дарддæр бацæуын скъоламæ, цæмæй ахуыр кæнон сывæллæтты».

Педагогон институты разамынды хъуыдымæ гæсгæ, ирон æвзаджы ахуыргæнæджы дæсныйад равзарынц æцæгдæр кæй зæрдæмæ цæуы, уыцы фæсивæд. Фæлæ, æмтгæй райсгæйæ та, ацы дæсныйад абон парахат нæу. Иу проблема ма у уый, æмæ ам скъолатæй заказтæ нæ исынц, цæмæй сын куыд хъæуы, афтæ цæттæ кæной специалистты. Уымæ гæсгæ се ‘ппæт студентты дæр цæттæ кæнынц иумæйаг программæмæ гæсгæ.

Саламаты Лидæ, Цæгат Ирыстоны паддзахадон педагогон институты ахуыргæнæг: «Студенттæн ис тынг хорз уавæртæ нæ институты. Ис сын стипендитæ, наукон куыст кæнынц, сæ бон у институты фæстæ аспирантурæмæ бацæуын».

Паддзахадон университеты фыццаг проректор Хъамболты Тамерланы хъуыдымæ гæсгæ ма, ирон æвзаджы райрæзты хъуыддаджы стыр бынат ахсынц национ дзыллон информацийы фæрæзтæ, уæлдайдæр та – радио æмæ телеуынынад. Профессоры хъуыдымæ гæсгæ, паддзахадон телерадиокомпани «Алани»-йы бындурыл ацы фарста алыг кæнынæн фаг фадæттæ нæй. 

Хъамболты Тамерлан, ЦИПУ-йы фыццаг проректор: «Ныр нæм цы телеуынынад ис «Алани», уый республикæйы бæрны нæй, феле федералон компани «Россия»-йы бæрны. Нæ бон ирон æвзагыл культурæйы хабæрттæ кæнын афтæ бирæ нæу, уымæн æмæ нын рæстæг Мæскуы дæтты. Уыцы рæстæг нæ бынæттон равдыстытæн фаг нæу. Цалынмæ нæхи республикон национ телеуынынад нæ саразæм, уæдмæ уыцы фарстатæ нæ бон лыг кæнын дæр нæ уыдзæн».

Ацы фарстатæм сæ цæст дарынц, Цæгат Ирыстоны сæргълæууæджы цур цы къамис арæзт æрцыд, уый уæнгтæ. Йæ хыгъды сты – республикæйы разамынды, министрадты æмæ ведомствæты, æхсæнадон организациты æмæ уæлдæр ахуыргæнæндæтты минæвæрттæ.

Санаты Ритæ, РЦИ-Аланийы ахуырады æмæ наукæйы министрады хайады хицау, Цæгат Ирыстоны сæргълæууæджы цур къамисы бæрнон секретарь: «Уыцы къамис цы фарстатæ æвæры йæ размæ, уыдон тынг ахъаззаг сты нæ республикæйæн».

Æвзаджы райрæзты хъуыддаджы нырма бирæ хæстæ сæххæст кæнын хъæуы – национ радио- æмæ телеуынынад саразын, фæсивæды ‘ргом здахын мадæлон æвзагмæ. Уыцы фарстатыл хъæуы иумæйагæй кусын.