Ныййарджыты номыл равдыстой концерт. Архайдтой дзы Цæгат Ирыстоны зындгонд артисттæ æмæ хихъæппæрисадон къордтæ. Бæрæгбонмæ æрбахуыдтой бирæсывæллонджын мадæлты, фæллойы ветеранты, кадджын ахуыргæнджыты.
Ныййарджыты номыл равдыстой концерт.
Архайдтой дзы Цæгат Ирыстоны зындгонд артисттæ æмæ хихъæппæрисадон
къордтæ.
Бæрæгбонмæ æрбахуыдтой бирæсывæллонджын мадæлты, фæллойы ветеранты,
кадджын ахуыргæнджыты. Се ппæтæн дæр радтой арфæйы фыстæджытæ. Фæстæдæр
уазджытæ бабæрæг кодтой Мады музей. Зæгъын хъæуы уый, æмæ Цæгат Кавказы у
иунæг. Федтой дзы цымыдисаг равдыст. Æппæт экспонаттæ дæр баст сты
ныййарæджы номимæ. Ис дзы Цæгат Ирыстоны сгуыхт сылгоймæгты хуызистытæ:
наукæты доктортæ, артисткæтæ, ахуыргæнджытæ стæй Фыдыбæстæйы Стыр хæсты
архайджытæ. Сæрмагондæй ацы бæрæгбонмæ национ музейы кусæг Гадзиаты
Фузæйы хъæппæрисæй уагъд æрцыд чиныг «Хæларзæрдæ сылгоймаг, мæ сæрæй дын
ныллæг кувын».
Танделаты Людмилæ, 4 чызджы мад: «Тынг
райгонд дæн ацы бæрæгбонæй. 17-æм лицейы алы хатт дæр арæзт æрцæуы ацы
бæрæгбон. Тынг зæрдиагæй йæ бацæттæ кæны лицейы директор Челдыты Верæ.
Æрбахоны йæм разагъды мадæлты, Ирыстонæн кадджын цот чи схъомыл кодта,
уыдоны. Рæсугъдæй арвитæм ацы бæрæгбон».
Козаты Петр, Национ музейы кусæг:
«Æвæццæгæн ирон адæммæ мад, мады бынат уыд бынтон фидар æвæрд
кæддæриддæр. Нæхи куы абарæм сыхаг республикæтимæ, уæд ирон сылгоймагæн
бартæ дæр фылдæр лæвæрд уыдис æмæ йæ разы домæнтæ дæр фылдæр уыдысты.
Хæсты быдырмæ иу нæлгоймæгтæ куы рахызтысты, уæд сæ тых фаг нæ кодта
æмæ-иу уæд сæ фарсмæ балæууыдысты сылгоймæгтæ».