Республикон конкурсы архайынмæ курдиæттæ балæвæрдтой 20 коллективæй фылдæр
«Хæлардзинады симгæ кафт». Ахæм сæргондимæ мадзал арæзт æрцыд Цæгат Ирыстоны паддзахадон базарадон-экономикон колледжы. Республикон конкурсы архайынмæ курдиæттæ балæвæрдтой 20 коллективæй фылдæр. Уыдон уыдысты скъолаты, астæуккаг æмæ уæлдæр ахуыргæнæндæтты минæвæрттæ. Хæлттæ æппаргæйæ, алы командæ дæр равзæрста, Уæрæсейы территорийы чи цæры, ахæм иу адæмы хатт. Ахуырдзаутæ æмæ педагогтæ сæ хæслæвæрдтæм бацыдысты бæрнонæй. Хъуыди сæ сфæлдыстадон миниуджытæ раргом кæнын. Цы адæмы хатт равзæрстой, уый тыххæй бацæттæ кодтой историон цаутæ, æвзаджы хицæндзинæдтæ, литературон, музыкалон уацмыстæ æмæ суанг национ хæринæгтæ дæр. Жюрийы хыгъды уыдысты национ политикæйы æмæ æддагон бастдзинæдты, стæй ахуырады æмæ наукæйы министрадты минæвæрттæ. Конкурсы уæлахиздзаутæн ракодтой зынаргъ лæвæрттæ.
