Ныридæгæн сси хъæздыг коллекцийы хицау
Рагæй-æрæгмæ дæр æрмдæснытæ дисы фтыдтой аивадуарзджыты. Кæд æмæ бирæвæрсыг у æрмдæсныйад, уæддæр дзы алы сфæлдыстадон адæймаг дæр ссардзæн йæ зæрдæмæ хæстæгдæр хъуыддæгтæ. Афтæ нæ дарддæры æрмæджы хъайтар дæр. Мæхъиты Оксанæ дыууæ азы размæ аразын райдыдта бæмбæгæй хъазæнтæ. Ныридæгæн сси хъæздыг коллекцийы хицау. Фæлæ ма йæм ис бæр фæндтæ æмæ нысантæ. Цавæртæ, уый тыххæй радзурдзæн Фидараты Маринæ.
Мæхъиты Оксанæйы схонæн ис диссæгтæ аразæгæй. Уымæн æмæ йæхи къухтæй сфæлдисы аргъау. Уыимæ хуымæтæг æрмæгæй пайда кæнгæйæ. Цымыдисаг хъазæнтæ аразы бæмбæгæй. Йæ коллекцийы фенæн ис æппынæдзух тагъдгæнаг тæрхъусы, зындгонд аргъау «Алиса в стране чудес»-æй, хъæлдзæг Арлекины, лæппу Алешæйы сау каркимæ. Алы хъайтарæн дæр ис йæхи истори æмæ зæрдæйы ахаст. Хъазæнты æддаг бакаст цæмæй иттæг хорз уа, уый тыххæй автор бæстон ахъуыды кæны алы лыстæг хъуыддагыл дæр. Райдай уæлæдарæсæй æмæ аивгæнæнтæй фæуы.
Бамбæгæй арæзт хъазæнтæм уарзондзинады истори райдыдта 2 азы размæ. Уæд Оксанæ базонгæ уырыссаг æмæ немыцаг æрмдæсныты куыстимæ. Дыууæ æнусмæ технологи нæ аивта. Хъазæн, раздæрау, фæаразынц, рагацæу кæй сахорынц, ахæм бæмбæгæй. Уый фæстæ та сæ сахорынц акрилæй, гуашæй, кæнæ акварелы ахорæнтæй.
Оксанæйы куыстытæ æнцонæй схонæн ис гыццыл шедевртæй. Иу хъазæн иннæйы хуызæн нæ вæййы, алы экземпляр дæр у иунæг. Уыимæ йæ коллекцийы нæй, парахат чи у, æмæ тагъд чи уæй кæны, ахæм персонажтæ. Æрмæстдæр ирд æмæ зæрдæмæхъаргæ хъайтартæ. Сæ цæсгæмттæ дæр сын автор скæны йæхæдæг.
Ацы бæмбæгæй конд хъазæнтæ та æрбынат кодтой авторы хæдзары тæрхæджытыл. Уыдонмæ бакæсгæйæ, адæймагмæ афтæ фæкæсы, цыма дæм сдзурынмæ хъавынц. ли
Дæ хæлар зæрдæйæ æмæ уарзондзинадæй адæмæн фæхай кæнын. Уый у Оксанæйæн æппæтæй сæйрагдæр. Уымæн æмæ алы хъазæны дæр бавæры йæ уды хъарм. Нывгæнæгмæ ис бирæ фæндтæ æмæ нысантæ. Сæ иу – рагон зымæгон горæт саразын. Уыдзæн дзы бирæ цымыдисаг персонажтæ, æмæ цæрдзысты рæсугъд музыкæйы зæлтæм хъусгæйæ.
