Уый къухы бафтыд, проект «Профессионалитет»-мæ гæсгæ
100 азы фæстæ бындурон цалцæг. Мæйы размæ Дзæуджыхъæуы паддзахадон бирæвæрсыг техникумы райдыдтой рацарæзты куыстытæ. Уый къухы бафтыд, проект «Профессионалитет»-мæ гæсгæ. Ахуыргæнæндон уырдæм хаст æрцыд ацы аз. Цалцæггæнæн куыстытæ куыд цæуынц, уый федта республикæйы ахуырады æмæ наукæйы министр Алыбекты Эллæ. Бæлвырддæр хабæрттæ радзурдзæн Чехойты Фатимæ.
Паддзахадон металлургон техникумы бæстыхайы куыстытæ бацыдысты сæ тæмæны. Фыццаг къæпхæны цæуы демонтаж. Дарддæр та ногтæй баивдзысты электрон тыхы телтæ æмæ зынгсирвæзтыты ныхмæ хъусынгæнæн системæ.
Республикæйы ахуырады æмæ наукæйы министр Алыбекты Эллæ сбæрæг кодта куыстыты цыд. Техникумы бæстыхай, культурон нысаниуæг кæмæн ис, ахæм объект кæй у, уымæ гæсгæ йын йæ цалцæг бабар кодтой сæрмагонд куыстуатæн. Бындурон цалцæг скæнынмæ бæстыхай æнхъæлмæ каст 100 азæй фылдæр.
Республикæйы рæвдауæндæтты æмæ скъолаты активонæй бавнæлдтой бындурон цалцæггæнæн куыстытæм. Ныр та ма сæм бафтыдысты астæуккаг профессионалон ахуыргæнæдæттæ. Цæгат Ирыстоны ахуырады æмæ наукæйы министр Алыбекты Эллæ куыд фæбæрæг кодта, уымæ гæсгæ алы аз дæр регионы бюджетæй 1 млрд. сомы радих кæнынц астæуккаг профессионалон ахуырадæн æххуысæн æмæ дзы бюджетон бынæттæ саразынæн.
Сентябры фæнд кæнынц ахуыргæнæндон байгом кæнын. Студенттæн сæ практикон ахуыртæ райдайдзысты нырыккон уавæрты, ног техникон фæрæзтæй пайдагæнгæйæ.
