Экспозици конд æрцыд æрмдæсныйы 60 азы кадæн
Мæскуыйы Думæйы байгом Хуссар Ирыстоны сгуыхт нывгæнæг Гобозты Владимиры куыстыты равдыст «Зеркальное прикосновение». Экспозици конд æрцыд æрмдæсныйы 60 азы кадæн. Йæ байгом кæныны кадджын мадзалы архайдтой Хуссар Ирыстоны президент Бибылты Анатолий, Республикæ Хуссар Ирыстоны минæвар Уæрæсейы Гасситы Знауыр æмæ Мæскуыйы Думæйы æмсæрдар Алексей Шапошников. Йæ ныхæстæм гæсгæ ахæм экспозицитæ хъæугæ сты Мæскуыйы парламенты æмæ стыр аргъ скодта Гобозты Владимиры куыстытæн. Журналисттæн куыд загъта нывгæнæг, афтæмæй йæ сюжеттæ æмæ персонажтæ сты æрымысгæ, йе взонг царды бонтæй. Фæлæ хæстæг сты цардмæ. Гобозты Владимир у нывгæнджыты æппæтдунеон федерацийы уæнг, æппæтадæмон равдыстыты лауреат. Йæ куыстытæ сты Испанийы, Италийы æмæ Английы музейты æмæ хи коллекциты.
