Уыцы хæрзиуæджы аккаг сси йæ проект «Вахтангов. Путь домой»
Мæскуыйы театралон преми «Хрустальная Турандот»-ы сæрмагонд приз ацы аз райста Евгений Вахтанговы номыл театр. Уыцы хæрзиуæджы аккаг сси йæ проект «Вахтангов. Путь домой». Уый æххæст кæнгæйæ, Дзæуджыхъæуы бындуронæй сног кодтой зындгонд режиссеры райгуырæн хæдзар. Статуэткæ нæ республикæмæ сласта мæскуыйаг театры директор Кирилл Крок, æмæ йæ кадджын уавæры радта хæдзар-музейæн.
Театралон символ – принцесса Турандот. Амæй фæстæмæ Евгений Вахтанговы хæдзар – музейы аивадуарзджытæн фадат уыдзæн статуэткæ «Хрустальная Турандот» фенынæн. Мæскуыйаг театры директор Кирилл Крок куыд зæгъы, афтæмæй театралон премитæ сты бирæ, фæлæ «Хрустальная Турандот» уæлдай ахсджиаг у, уымæн æмæ театралон сезон æхгæнгæйæ хуыздæр сфæлдыстадон архайджыты схорзæхджын кæнынц ацы премийæ.
Æмæ кæд Мæскуыйы театралон сезон сæхгæнынц преми «Хрустальная Турандот»-æй, уæд Дзæуджыхъæуы та, зæгъæн ис, æмæ сезон бакæндзысты уымæй. Бафиппайын хъæуы уый дæр, æмæ 32 азмæ премийæ хорзæхджын кодтой æрмæстдæр театралон равдыстытæ, актерты æмæ режиссерты куыстытæ æмæ афтæ дарддæр. Фæлæ ныр та, фыццаг хатт уыцы хæрзиуæджы аккаг сси проект «Вахтангов. Путь домой».
Тæбæхсæуты Балойы номыл ирон академион театры актрисæ Цæрикъаты Риммæ куыд зæгъы, афтæмæй статуэткæ «Хрустальная Турандот» у сфæлдыстадон кусджыты ног бæрзæндтæм хизыны разæнгардгæнæн фæрæз.
Уыцы ахсджиаг цау æхсызгон уыд канд сфæлдыстадон кусджытæн нæ, фæлæ ма аивадуарзджытæн дæр. Ууыл та дзурæг у, мадзалмæ бирæ адæм кæй æрбацыд, уый. Кæй зæгъын æй хъæуы, кадджын хæрзиуæг та Евгений Вахтанговы хæдзар – музейы кад систа ноджы бæрзонддæр.
