Хетæгкаты Къостайы номыл Хуссар-Ирыстойнаг драмон театры труппæ районы культурæйы галуаны адæмы размæ рахаста советон фыссæг Николай Эрдманы пьесæмæ гæсгæ вæрд спектакль
Мæздæджы æххæст кæнын райдыдтой республикæйы театралон архайджыты Цæдисы проект «Интеграция Север-Юг». Хетæгкаты Къостайы номыл Хуссар-Ирыстойнаг драмон театры труппæ районы культурæйы галуаны адæмы размæ рахаста советон фыссæг Николай Эрдманы пьесæмæ гæсгæ вæрд спектакль. Комеди «Химарæг» фыст æрцыди 1928-æм азы. Фæлæ идеологон аххосæгтæм гæсгæ йæ театрдзауы не ссардта. Сценæйы йæ æвдисын райдыдтой æрмæстдæр рацарæзты рæстæг. Хуссар Ирыстоны театры репертуары ацы постановкæ фæзынди фарон. Спектакль театрдзауы зæрдæйы гуырын кæны алыхуызæн хъуыдытæ. Сæйрагдæр та уый, æмæ алчидæр хъуамæ йæ сарæзт хъуыддæгтыл ахъуыды кæна. Актерты размæ вæрд уыди хæс, ацы спектакль æмбæлгæ хуызы рахæссын адæмы размæ, æмæ сæ къухы бафтыд иттæг хорз. Цымыдисаг ма уый у, æмæ траги-комедийы кæронбæттæн райхылыны рæстæг режиссеры æрхъуыдыдзинадмæ гæсгæ, спектаклы архайынц театрдзаутæ сæхæдæг дæр. Республикæйы театралон архайджыты Цæдисы минæвæрттæ къуыд зæгъынц, афтæмæй проект æххæстгонд цæудзæн дарддæр дæр. Сфæлдыстадон къордтæн балцытæ уыдзæни республикæйы районтæм. Ахæм хуызы та фæнд кæнынц гастрольты традицитæ сног кæнын. Уымæн æмæ уый хорз фæрæз у театр чи уарзы, ахæм адæмы иу кæнынæн.
