Бацæттæ йæм кодтой 3 экспозицийы
Мæздæджы аивæдты скъолайы уыд вернисаж «Я помню чудное мгновение». Бацæттæ йæм кодтой 3 экспозицийы. Сæ куыстытæ дзы равæрдтой куыд æрыгон, афтæ фæлтæрдджын нывгæнджытæ. Цæгат Ирыстоны аивæдты лицейы минæвæрттæ та равдыстмæ æластой, Хетæгкаты Къостайы юбилеймæ арæзт конкурсы фыццаг бынæттæ цы нывтæ райстой, уыдон. Уыимæ ма равдысты фенæн уыд Пушкины сфæлдыстадимæ баст куыстытæ. Зындгонд уырыссаг поэты æмдзæвгæтæм гæсгæ романс та бацæттæ кодтой æмæ адæмы размæ рахастой Луковскæйы аивæдты скъолайы артисттæ. Æппæт регионты хсæн равдыст «Диалог культур»-ы се сфæлдыстад равдыстой Цæгат Кавказы республикæты минæвæрттæ, стæй Мæскуыйы лицейы ахуыргæнджытæ. Специалистты ныхæстæм гæсгæ, ахæм хъуыддæгты фæрцы фылдæр кæнынц сфæлдыстадон гæнæнтæ, стæй пайдайаг сты суинаг нывгæнджыты рæзтæн.
