60 вольеры, алкæцыйы дæр ис куыдзы будкæ æмæ дон нуазæн бынат
Фæстаг рæстæг Мæздæджы фылдæрæй-фылдæр кæнынц дзæгъæл цæрæгойтæ. Уый фæдыл хаст æрцыд уынаффæ, питомник байгом кæныны тыххæй. Ног бынаты ис 60 вольеры. Цæрæгойтæ дзы цух ницæмæй æййафынц. Ам сæм зилынц æмæ сын кæнынц хъæугæ процедурæтæ. Сæ куысты тыххæй бæстондæр радзурдзæн Чехойты Фатимæ.
Павлодольскæйы станицæйы цæрæг Калоты Жаннæйæ хуыздæр ничи зоны, куыд хъæхъхъаг сты æнæхæдзар цæрæгойтæ, уый. 10 азы размæ йæ 5-аздзыд чызгмæ фæлæбурдта куыдз. Уæд Жаннæ бахъахъхъæдта сывæллоны куыдзы хæцтæй, фæлæ чызг уæдæй нырмæ иунæгæй нæ уæнды уынгмæ рацæуын. Жаннæ бирæ азты цыди администрацимæ курдиатимæ – районы питомник саразыны тыххæй.
Ног питомник кусын райдыдта хæрзæрæджы. Ныридæгæн дзы фæзынди фыццаг цæрджытæ. 60 вольеры, алкæцыйы дæр ис куыдзы будкæ æмæ дон нуазæн бынат. Æнæхæдзар куыйтæ ам ницы хъуаг æййафынц. Дæттынц сын сæрмагонд хæринаг. Зилгæ та сæм кæнынц питомниччы кусджытæ. Уыдон æдзухдæр æфснайынц вольертæ. Уæлдай цæстæнгас дарынц къæбылатæм. Питомниччы директор Гусаты Зауырбæджы ныхæстæм гæсгæ, куыстуатмæ сæ курдиæттимæ адæм дзурын райдыдтой йæ фыццаг бонæй фæстæмæ.
Нырма уал питомниччы ветеринарæн нæй хицæн агъуыст. Рæстæгмæ бафыстой бадзырд ветеринарон станцæйимæ. Специалисттæ æрбацæуынц питомникмæ, куыйтæм сæ цæст фæдарынц карантины рæстæг. Уый фæстæ та æнæхæдзар цæрæгойтæн скæнынц стерилизаци. Питомниччы куыйтæ æппынæдзух нæ цæрдзысты. Ветеринарон процедурæты фæстæ сæ уаддзысты æддæмæ.
Æнæхæдзар цæрæгойты фарста районæн рагæй уыд лыггæнинаг. Ам раздæр фæнд кодтой питомник байгом кæнын. Ног куыстуаты ма хъæуы ветеринары агъуыст хъæугæ кусæн дзауматæй сифтонг кæнын. Уымæй уæлдай ма фæнд кæнынц питомниччы алфамблай территори афтæ рацаразын, цæмæй куыйтæ дарынæн бæзза. Хъæуы ма, цæрæгойты хæринæгтæ æвæрæнынæн, хицæн бынат самайын дæр.
Æппæт арæзтадон куыстытæ питомниччы фæуындвæнд кæнынц афæдзы кæронмæ. Ардыгæй алы адæймагæн дæр йæ бон у куыдз райсын. Ам алчидæр ссардзæн йæхицæн ног æмбал.
