Мæздæджы Дубининты æфсымæрты скверы цы скульптурæтæ æмæ архитектурон формæтæ ис, уыдон рагæй хъæуы реставраци скæнын. Композицитæн баззад æрмæст се æртыккæгæм хай.
Афтæ рауад, культурон намысы объекттæ бирæ рæстæг администрацийы балансы кæй нæ уыдысты, уый тыххæй. Уымæ гæсгæ горæты хицауадæн йæ бон нæ уыд фæрæзтæ сæ базилыныл хардз кæнын. Æхсæнадон организаци «Зæронд горæт»-ы активисттæ фæсидтысты администрацимæ архитектурон формæтæ банывыл кæныны фæдыл. Мæздæджы администраци æмæ Сывæллæтты нывкæнынады скъола ссардтой, скульптурæтæ сног кæныныл чи сразы, ахæм мастеры.
Уæрæсейы нывгæнджыты уæнг, Цæгат Ирыстоны сгуыхт нывгæнæг, скульптор Кучиты Аслæнбег бабæрæг кодта Мæздæг, федта, цавæр куыстытæ сæххæст кæнын хъæуы, уый. Куыд сбæрæг ис, афтæмæй Аслæнбег у, 1994-æм азы æрыгон нывгæнджыты симпозиумы фæстæ Мæздæгмæ цы скульптурæтæ æрбаластой, уыдонæй иуы автор. Мастер куыд загъта, афтæмæй скульптурон формæтæ сног кæныныл архайдзæн сæрмагонд зæрдæйы ахастимæ. Хæстæгдæр рæстæг бавналдзæн куыстытæм.
