Сарæзтой сæ Мæздæггаг гарнизоны æфсæддонтæн
Мæздæджы кадджын уавæры эксплуатацийы радтой æртæ 5 уæладзыгон хæдзары. Сарæзтой сæ Мæздæггаг гарнизоны æфсæддонтæн. Контрактмæ гæсгæ цы 264 бинонтæ службæ кæнынц, уыдон дæгъæлтæ райстой сæ фатертæй. Арфæ ракæнынмæ сын æрбацыдысты 58-æм æфсады, Мæздæджы гарнизоны минæвæрттæ, æппæтуæрæсеон организаци «Хæстон æфсымрад»-ы æмæ районы ветеранты советы уæнгтæ. Æфсæддонтæ ацы цаумæ рагæй æнхъæлмæ кастысты, бирæтæ дзы цæрæнуатмæ æнхъæлмæ кастысты 10-гай азтæ. Чидæртæ дзы æххуырсгæ фатерты цардысты, чидæртæ сæ хæстæджытæм, иу ныхасæй, æййæфтой зындзинæдтæ. Хъахъхъæнынады министрады программæйы фæлгæты Мæздæджы районы хъуамæ арæзт æрцæуа 12 бирæуæладзыгон хæдзары. Иу фондзуæладзыгонд хæдзар дзы радтой амæй размæ. Ныр та ма æфсæддонтæ фатертæ райстой ноджыдæр 3 хæдзары. Ацы микрорайоны хæдзæрттæй уæлдай аразынц инфраструктурæ дæр, ныридæгæн дзы байгом кодтой скъола æмæ сывæллæтты рæвдауæндон.