Куы байгом ис, ууыл мæй йеддæмæ нæма рацыдис, фæлæ бынæттон цæрджытæ стыр аргъ скодтой ног медицинон куыстуатæн
«Хуыцауы лæвар» – зæгъгæ, афтæ Мæздæджы цæрджытæ хонынц сæ ног поликлиникæ. Куы байгом ис, ууыл мæй йеддæмæ нæма рацыдис, фæлæ бынæттон цæрджытæ стыр аргъ скодтой ног медицинон куыстуатæн. Семæ разы сты поликлиникæйы кусджытæ сæхæдæг дæр. Ног куыстуаты архайды тыххæй радзурдзæн Гуытъиаты Алинæ.
Поликлиникæ аразын райдыдтой нудæс азы размæ. 2011 азы уал дзы байгом кодтой дыууæ корпусы. Авд азы фæстæ аразджытæ бавнæлдтой проект кæронмæ сæххæст кæнынмæ æмæ уый хыгъд дæс мæймæ фæзынд ноджыдæр иу бæстыхай. Ам æрбынат кодтой сывæллæтты æмæ хистæр кары адæмы реабилитацийы хайад. Мæздæггæгты бон дзы у сæхи сдзæбæх кæнын физиотерапия, массаж æмæ æндæр мадзæлтты фæрцы, стæй пайда кæнын бассейнæй.
Ай та уын ног, егъау лаборатори. Ам специалистты бон у кусын æнæниздзинадхъахъхъæнынады æппæт домæнтæм гæсгæ. Физиокабинет дæр ифтонггонд у æппæт техникæйæ. Ныртæккæ ам йæ æнæниздзинад фидар кæны Атайты Венæ. Сылгоймаг бирæ азты тох кæны уæззау низимæ. Раздæр æй хъуыдис иу бæстыхайæ иннæмæ цæуын, стæй сахатгай рады бадын.
Ног поликлиникæйы ис æппæт уавæртæ дæр реабилитацийæн. Дохтырты хъуыдымæ гæсгæ, рычынæн афойнадыл реабилитацион мадзæлттæ куы саразай, уæд гæнæн ис æмæ тагъд адзæбæх уыдзæнис æмæ йæ инвалиды къорд дæр нæ бахъæудзæнис.
Иннæ аз Мæздæджы поликлиникæ бæрæг кæны йæ нæуæдз фондз азы юбилей. Ныртæккæ у нырыккон медицинон куыстуат. Ис дзы æппæт мадзæлттæ дæр, цæмæй цæрджытæн дæдта хæрзхъæд æмæ нывыл медицинон лæггæдтæ.
