Конкурс ацыд парти «Иугонд Уæрæсе»-йы проект «Историческая память»-ы фæлгæты
Мæздæджы скъола-интернат æмæ станица Павлодольскæйы ахуыргæнæндон систы æппæтуæрæсеон конкурс «Школьный музей: цифровой формат»-ы уæлахиздзаутæ. Конкурс ацыд парти «Иугонд Уæрæсе»-йы проект «Историческая память»-ы фæлгæты. Архайдтой дзы Уæрæсейы 69 регионæй мин скъоладзауæй фылдæр. Педагогтæн æмæ истори чи уарзы, уыцы фæсивæдæн арфæ ракодтой политикон парти «Иугонд Уæрæсе»-йы минæвæрттæ. Уазджытæн экскурси скодтой музейыл, радзырдтой сын, экспозици куыд сæмбырд кодтой, уый тыххæй. Стендтыл æвдыст цæуы историон æвдисæндартæ, стæй районы зындгонд адæмты цардвæндагæй ист ирд цаутæ. Скъолаты музейты фыццаградон хæстæй иу у Фыдыбæстæйы Стыр хæсты фронтовикты æмæ фронты фæсчъылдым чи фæллой кодта, уыдоны ном сæнусон кæнын. Экспонаттимæ дарддæры куыстæн радтой сертификаттæ.
