Веселæйыхъæуы адæмон театр зæрдиагæй «æгасцуай» загъта йæ кадджын уазджытæн
Сæ ном бахъахъхъæдтой. Мæздæджы районы арæзт æрцыд адæмон театрты конкурс-æркаст. Веселæйыхъæуы адæмон театр зæрдиагæй «æгасцуай» загъта йæ кадджын уазджытæн. Уыдон та уыдысты адæмон сфæлдыстады республикон Центры минæвæрттæ. Хæдахуыр артисттæ аивадуарзджыты размæ рахастой Айларты Асæхмæты пьесæмæ гæсгæ æвæрд спектакль «Совесть». Ирдæй дзы вдыст цæуы иу бинонты цард. Фæлæ ма дзы уымæй дарддæр раргом кодтой адæймаджы сæйрагдæр миниуджытæ. Спектакль ахуыр кæны хæлар зæрдæйы ахастыл æмæ æндæр хорз æууæлтыл. Сæйраг рольты ахъазыдысты Веселæйы, Ново-Георгиевскæйы æмæ КомАровойы хъæуты цæрджытæ. Спектакль сæвæрдтой ирон æвзагыл. Сæйраг сурæттæй иу дзы йæхиуыл сбарста Ново-Георгиевскæйы цæрæг, 9 аздзыд лæппу Лазарты Тамерлан. Æвзонг артист фыццаг хатт рацыд сценæмæ, фæлæ ныридæгæн дæр йæ бæллиц бæлвырд у – фæнды йæ профессионалон актер суæвын. Ацы бон ма бæрнон жюрийы размæ се сфæлдыстад рахастой Мæздæджы адæмон театры артисттæ. Равдыстой Борис Васильевы уацмысмæ гæсгæ æвæрд спектакль «А завтра была война». Театр «Триумф»-ы актертæ та равдыстой постановкæ «Ночь перед Рождеством». Æртæ театры дæр адæмоны ном бахъахъхъæдтой.
