Лæггад кæнынц хистæр кары адæмæн
Мæздæджы районы хъæуты кусынц цæугæ медицинон комплекстæ. Лæггад кæнынц хистæр кары адæмæн. Эндокринолог, кардиолог, флюорографи æмæ маммографи – профилон медицинон æххуыс райстой 200 адæймагæй фылдæр. Диспансеризацимæ æрбахуыдтой, 65 азæй фылдæр кæуыл цæуы, районы ахæм цæрджыты. Специалисттæ 5 хъæуы минæвæрттæн консультацитæ скодтой поселок Притеречныйы амбулаторийы. Мæздæджы районы социалон лæггæдты комплексон центры кусджытæ йæм æрбаластой Черноярскийы æмæ Ново-Осетинскийы станицæты, стæй Елбайты æмæ Тельмæны поселокты цæрджыты. Ахæм мадзæлттæ районы æннæниздзинадхъахъхъæнынады къабазы специалисттæ фæнд кæнынц алы кварталы дæр аразын. Дæрддзæф хъæуты цæрджытæн-иу фехъусын кæндзысты рагацау, дохтыртæ æрбацæудзысты, уый тыххæй. Мобилон комплекстæ кусынц, национ проект «Дæргъвæтин активон цард» æххæст кæнгæйæ.
