Стыр сценæйы кад кодтой алыхуызон конкурсты уæлахиздзаутæн
Мæздæджы районы культурæйы галуаны хатдзæгтæ скодтой Нартиадæйы азæн. Стыр сценæйы кад кодтой алыхуызон конкурсты уæлахиздзаутæн. Хæрзиуджытæ радтой æмдзæвгæтæ аив кæсджытæн, нывгæнджытæн, хæдахуыр артисттæн. Алы категорийы дæр ма кад кодтой педагогтæн æмæ разамонджытæн дæр. Гала-концертмæ хуынд æрцыдысты куыд районы цæрджытæ, афтæ Дзæуджыхъæуæй æмæ Цхинвалæй уазджытæ дæр. Се ппæтæн дæр раарфæ кодта Цæгат Ирыстоны культурæйы министры хæдивæг Хъуыссæты Зæлинæ. Куыд бафиппайдта, афтæмæй ахæм тематикон мадзæлттæ арæзт фæцæуынц бæрзонд æмвæзадыл. Ахсджиаг у нæ рагфыдæлты хæзнатæ хъахъхъæнын. Нарты кадджыты историйыл бæстон æрдзырдтой фыссæг Касаты Батраз, журналист Баскаты Уырызмæг æмæ Уæрæсейы сгуыхт нывгæнæг Дзукъаты Николай. Сценæмæ сæ курдиат рахастой цалдæр номинацийы уæлахиздзаутæ, стæй хореографион ансамбльты сфæлдыстадон коллективтæ. Сæ хуыздæр постановкæтæ равдыстой Хуссар Ирыстоны делегацийы минæвæрттæ.
