Куыстытæ æххæстгонд æрцыдысты нацпроект «Æнæниздзинадхъахъхъæнынад»-ы программæмæ гæсгæ
Мæздæджы районы Притеречныйы бындурон цалцæджы фæстæ байгом амбулатори. Кадджын мадзалы архайдтой Уæрæсейы Федерацийы президенты æххæстбарджын минæвар Цæгат Кавказы федералон зылды Владимир Надыкто, Цæгат Ирыстоны æнæниздзинадхъахъхъæнынады министр Тебиаты Сослан, республикæйы Хицауады æмæ районы администрацийы минæвæрттæ. Куыстытæ æххæстгонд æрцыдысты нацпроект «Æнæниздзинадхъахъхъæнынад»-ы программæмæ гæсгæ. Аразджытæ объект сцæттæ кодтой нысангонд фæткæй раздæр. Баивтой бæстыхайы сæр, хъармгæнæн, доны, вентиляцийы, канализацийы æмæ рухсы системæтæ. Сæрмагонд куыстытæ сæххæст кодтой рентген-кабинеты, бацæттæ кодтой афтечы пункт, сæвæрдтой ног хъæддзаума. Республикæйы бюджетæй цы уæлæмхасæн фæрæзтæ радих кодтой, уыдоны фæрцы бантыст балхæнын нырыккон ифтонггæрзтæ. Медицинон кусæнуаты иу радмæ балæггад кæныны фадат уыдзæн 100 адæймагæн. Притеречныйы æмæ хæстæгдæр хъæуты цæрджытæн сæ бон уыдзæн райсын терапевты, педиатры, стоматологы æмæ лабораторон лæггæдтæ.
