Проект «Знай наших»-ы фæлгæты интеллектуалон клуб «Альбус» йæ филиалæн Мæздæджы балæвар кодта ног кусæнгæрзтæ
Мæздæджы районы скъоладзаутæ архайдтой ерыстæ «Своя игра»-йы. Проект «Знай наших»-ы фæлгæты интеллектуалон клуб «Альбус» йæ филиалæн Мæздæджы балæвар кодта ног кусæнгæрзтæ. Зонындзинæдтæй кæм ерыс кодтой, уыцы конкурсы хатдзæгтæм гæсгæ, равзæрстой 15 адæймаджы. Уый фæстæ скъоладзаутæн интеллектуалон лекци бакаст клубы фыццаг магистр, йæ легендарон уæнг Дзуццаты Сергей. Уый уыди «Своя игра»-йы районы къæпхæны амонæг дæр. Архайджытæ сæ арæхстдзинад æмæ зонындзинæдтæ равдыстой 5 раунды. Дзуæппытæ лæвæрдтой литературæйы, аивады æмæ кинематографы къабæзты. Æппæтæй фылдæр баллтæ æрæмбырд кодта Раздольныйы скъолайы педагог Вера Прокофьева, стæй скъоладзаутæ Дулаты Георгий æмæ Дмитрий Касавченко. Æртæйæ дæр клуб «Альбус»-æй райстой призтæ, стæй сæ хæстæгдæр рæстæг æрбахондзысты интеллектуалон клубы телеуынынады съемкæтæм.
