1942-æм азы чи фæмард, уыцы 9-æм гвардион дивизийы æфсæддонтæн цыртдзæвæн фæзынд поселокмæ бацæуæны
Мæздæджы районы Советскийы поселочы байгом кодтой Кавказ хъахъхъæнджытæн Мемориал. 1942-æм азы чи фæмард, уыцы 9-æм гвардион дивизийы æфсæддонтæн цыртдзæвæн фæзынд поселокмæ бацæуæны. Мæздæджы районы агурджытæ сбæрæг кодтой æдзард салдæтты мыггæгтæ, æмæ бахастой фæндон сæ нæмттæ сæнусон кæныны тыххæй. Советскийы поселочы территорийы чи фæмард, уыдоны тыххæй æрмæг ссарынмæ се вæрæн бахастой бынæттон скъоладзаутæ дæр. Ацы цыртдзæвæн Мæздæджы районы сси, Махмади Даулетовы агурæн отряды архайды фæрцы чи фæзынд, ахæм 6-æм номарæн объект. Мемориал саразыны архайдта поселочы разамынд æмæ цæрджытæ, Мæздæджы Æдасдзинады федералон службæйы хайад, стæй меценат Æлборты Виктор. Кадджын мадзалы зæлыдысты хæстон зарджытæ. Æдзард хæстонты номыл, минут æдзæмæй алæууыны фæстæ, мемориалыл сæвæрдтой дидинджытæ æмæ веноктæ.
