Спектакль «Бирæгъ æмæ авд сæныччы» адæмы размæ рахастой ног хуызы
Мæздæджы районы культурæйы галуаны стыр сценæмæ, театр-студи «Солнечный город»-ы премьерон спектаклы архайынмæ рацыдысты дауны синдромимæ сывæллæттæ. Баиу сæ кодта театрмæ æмæ сфæлдыстадмæ уарзондзинад. Се нæниздзинад цудыд кæмæн у, уыцы сывæллæттæ дыууæ азы размæ архайын райдыдтой Мæздæджы фыццаг инклюзивон театры, бындур ын сæвæрдта республикæйы театралон архайджыты Цæдисы уæнг Елена Давыдова. Йæ юбилейон бон Еленæ уыди сценæйы. Спектакль «Бирæгъ æмæ авд сæныччы» адæмы размæ рахастой ног хуызы. Актертимæ сценæмæ рацыдысты районы культурæйы галуаны æндæр сфæлдыстадон къордтæ дæр. Иумæ сын бантысти æрбацæуджыты аргъæутты дунемæ ахонын, эмоционалонтæ рауадысты эпизодтæ дæр. Спектаклы фæстаг аккорд куы азæлд, уæд адæмы къухæмдзæгъдæн кæрон нал уыди. Актертæ иууылдæр райстой кады гæххæттытæ æмæ арфæйы фыстæджытæ. Спектаклы режиссеры номыл та йæ юбилейы фæдыл хъуыстысты бирæ арфæтæ.
