Æртындæсæй дæр фæмард сты сæрмагонд æфсæддон операцийы зонæйы
Мæздæджы механикон-технологон техникумы сæнусон кодтой 13 рауагъдоны нæмттæ. Æртындæсæй дæр фæмард сты сæрмагонд æфсæддон операцийы зонæйы. Номарæн мадзалмæ æрбахуыдтой хъæбатыр службæгæнджыты хæстæджыты æмæ хиуæтты. Сæном сын æрæмысыдысты, минут æдзæмæй алæугæйæ. Зæгъын хъæуы уый, æмæ æппæт информаци æмæ документалон æрмæджытæ æмбырд кæнын расидти ахуыргæнæндоны педагого Хъулаты Кристинæ. Алы æфсæддон быцæуты чи фæмард, уыцы хъæбатырты номыл арæзт æрцыд тематикон изæр. Архайдтой дзы техникумы студенттæ, «Хæстон æфсымæрады» уæнгтæ, стæй ветеранты Советы минæвæрттæ. Патриотон хъомылад цалдæр биографийы дæнцæгыл равдисын у тынг ахсджиаг хъуыддаг. Афтæ снысан кодтой мадзалы сæйраг хæстæ, йæ саразджытæ. Æдзард хъæбатырты хæстæджытæн радтой арфæйы фыстæджытæ, ахæм, дæнцæгæн хæсиинаг лæппуты кæй схъомыл кодтой, уый тыххæй.
