Чиныджы бон сбæрæг кæнынмæ хуынд æрцыдысты Паддзахадон ансамбль «Терчы хъазахъхъæгты» солистты
Мæздæджы цымыдисаг хуызы арæзт æрцыд февралы традицион мадзал «Балæвар кæн чиныг библиотекæйæн». Районы центрон библиотекæйы кусджытæ æхсызгон лæвар скодтой сæ чиныгкæсджытæн, æмæ бæстыхаймæ бацæуæны сæвæрдтой аргъæутты хъайтарты дефиле. Музыкæйы зæлтæм уазджытæм æнхъæлмæ кастысты Буратино, Леший, Карлсон, Кот Базилио, Лиса Алиса, æмæ Золушка. Егъау куклатæ æмæ костюмтæ дæр конд уыдысты библиотекæйы кусджытæн сæхи къухтæй. Мадзал саразджыты хъуыдымæ гæсгæ, алкæмæн дæр фадат уыд сабидуджы фестынæн æмæ уарзон аргъæутты персонажтимæ атезгъо кæнынæн. Суанг ма заргæ дæр акодтой. Чиныджы бон сбæрæг кæнынмæ хуынд æрцыдысты Паддзахадон ансамбль «Терчы хъазахъхъæгты» солистты дæр. Артисттæ раарфæ кодтой се ппæтæн дæр, æмæ сын балæвар кодтой сæ ирд номыртæ. Акци «Балæвар кæн чиныг библиотекæйæн» алы аз дæр арæзт фæцæуы алы кары чиныгкæсджытæн. Лæппутæ æмæ чызджытæ æхсызгонæй архайдтой акцийы ацы хатт дæр, æмæ лæварæн æрбахастой сæ уарзон чингуытæ. Мæздæджы районы библиотекæты ныртæккæ ис чингуыты хъæздыг коллекцитæ.
