Мæздæджы районы прокурор профилон комитеты сæрдарыл сарæзта административон барадхæлды тыххæй хъуыддаг
Мæздæгмæ балц ногæй цæлхдуртимæ. Республикæйы æппæтæй дæрддзæфдæр районмæ фæндаг къаддæр чи кодта, уыцы ног уаццаг кадджын уавæры эксплуатацийы радтой ивгъуыд аз. Фæлæ дзы прокуратурæ раиртæста аипдзинæдтæ. Уый та тæссаг у фæндаггон змæлды архайджытæн. Мæздæджы районы прокурор профилон комитеты сæрдарыл сарæзта административон барадхæлды тыххæй хъуыддаг. Бæстондæр хабæрттæ радзурдзæн Фидараты Маринæ.
Федералон трассæ «Кавказ» – «Хурыхъæу-Малгобек-Мæздæг»-æн йæ иу уаццаг байгом кодтой ивгъуыд аз мартъийы. Ног фæндаг фадат радта, республикæйы дæрддзæфдæр районмæ балцы рæстæг дыууæ хатты фæкъаддæр кæнынæн. Арæзтадмæ сæ цæст дардтой цæстдарæн оргæнтæ, æмæ-иу аиппытæ рæстæгæй-рæстæгмæ рабæрæг кодтой.
Ацы аз, Зæронд Бæтæхъойы æмæ Хурыхъæуы хсæн фæндаджы 11 километры дæргъы уаццагыл æрцыдысты æвзæрдырдæм ивддзинæдтæ. Бæлвырддæр та фæндаг хæлын райдыдта. Июны асфальты уæлцъар ададжы ныххауди. Сæвзæрд фæндаджы æдасдзинады фарста. Уæвгæ уымæй размæ дæр ацы уаццаг нымад уыд тæссагыл. 2021-æм азы мартъийæ фæстæмæ дзы æрцыд 5 фæндаггон фыдбылызы, фæмарди дзы 3 адæймаджы, 4-æй та фесты алы хуызы цæфтæ.
Специалистты хъуыдымæ гæсгæ, фæндаг хæлын райдыдта, проекты рæдыдтытæ кæй æрцыд, уымæ гæсгæ. Нæ бахынцтой бынæттон рельеф æмæ гидрогеологон уавæр. Уый тыххæй дон цыди фæндаджы бынмæ, æмæ йын хæлдта йæ хуыр. Аипдзинæдтæ сбæрæг кодта Прокуратурæ дæр.
Ныртæккæ куыстытæ цæуынц, ламидæттæ кæй бахъыгдардтой, уыцы бынæтты. Специалисттæ сыгъдæг кæнынц фæхстæ æмæ æвæрынц бырутæ.
Фæндаггон специалисттæ техникон фарстатæ куы алыг кæной, уæд сараздзысты проект. Уый фæстæ бавналдзысты сæйраг куыстытæм. Уымæн бирæ рæстæг хъæуы. Процессмæ йæ цæст дары районы прокуратурæ.
Ныртæккæ фæндаджы дыууæ хæлд уаццагыл цæуæн ис дыууæрдæм дæр. Сыгъдæггæнæн куыстытæ цæуынц дарддæр.
