Цæгат Ирыстоны мидхъуыддæгты министр Артур Ахметханов фехъусын кодта, 30-æм апрелæй – 10 маймæ мидхъуыддæгты министрад кусдзæн карздæр фæткмæ гæсгæ. Ахæм уавæры сæ службæ æххæст кæндзысты æнæнхъæлæджы цауты министрады дæр.
1-æм майы профцæдисты æмæ политикон партиты регионалон хайæдты архайдæй Дзæуджыхъæуы ацæудзысты митингтæ. Уыцы бон хъахъхъæд цæудзысты адæмы цардæн ахсджиаг объекттæ. Пъæлицæйæгтимæ кусдзысты хъахъхъæнынады хи структурæтæ, хъазæхъхъæгтæ.
9-æм майы та уыдзæн æфсæддон парад. Сæйраг репетици ацæудзæн 7-æм майы. Парады архайдзæн танчыты къорд. 58-æм æфсады æмæ горæты администрацийæн бахæс кодтой, цæмæй уæззау техникæ цы уынгты ацæудзæн, уым арæзт æрцæуой асфальт бахъахъхъæныны мадзæлттæ. Æмбырды ма фехъусын кодтой: 9-æм майы Дзæуджыхъæуы базартæ нæ кусдзысты.
