Программæйы уыд 10 композицийы
Макар Куликовы фортепианойы музыкæйы изæр арæзт æрцыд Евгений Вахтанговы хæдзар-музейы. Программæйы уыд 10 композицийы. Се хсæн Бахы, Шопены, Бетховены, Шуберты, Рахманиновы æмæ Веберы æнæмæлгæ уацмыстæ. Æвзонг виртуоз ацагъта ирыстойнаг композитор Махъоты Ацæмæзы уацмыстæ дæр. Макар Куликов райгуырд Дзæуджыхъæуы. Хонынц æй Уæрæсейы хуссар хайы хуыздæр пианист. У æппæтуæрæсеон æмæ æппæтадæмон конкурсты лауреат. Ныртæккæ музыкант ахуыр кæны Мæскуыйы Фредерик Шопены номыл музыкалон аивады паддзахадон колледжы. Фидæны нысан кæны Мæскуыйы консерваторимæ бацæуын. Йе сфæлдыстадон изæрæй æхгæд æрцыд Вахтанговы хæдзары музыкалон изæрты сезон. 1-æм июнæй фæстæмæ ам сæ курдиат лæвар кодтой консерваториты профессортæ, композитортæ æмæ æппæтадæмон конкурсты лауреаттæ. Ахæм изæртæ аразыны хъæппæрис разынд Цæгат Ирыстоны композитоты Цæдисмæ, стæй музейы разамындмæ.
