УФ-йы хицауады сæрдары хæдивæг Ольга Городец цы селекторон æмбырд сарæзта, уым архайдта Цæгат Ирыстоны сæргълæууæг Мамсыраты Таймураз дæр. Ныхас цыд ахуыргæнæндæтты цæттæдинадыл ног ахуыры азмæ.
Ольга Городецы ныхæстæм гæсгæ ацы аз Уæрæсейы регионты сарæзтой 55 скъолайы. «Ахæм бæрæггæнæнтæ зæрдæмæдзæугæ не сты. Уый та у регионты лæмæгъ куыст. Хъæуы фылдæр скъолатæ аразын. Уымæн æмæ бирæ горæтты скъолатæ кусынц 2 рады. Кæмдæрты та 3 рады. Уый раст нæу» – загъта Ольга Городец.
Цæгат Ирыстоны ис 189 скъолайы. Уыдонæн сæ 7% кусынц 2 рады. 2014-2015-æм ахуыры азмæ куыд цæттæ сты, бæрæг кæны ведомствæты хсæн къамис. Уæлдай цæстдард цæуы бæстыхæйтты техникон уавæрмæ, зынгхуыссынгæнæн æмæ терроризмы ныхмæ æдасдзинадмæ, санитарон – эпидемиологон уавæрмæ.
Зынгсиввæстыты ныхмæ управленийы бæрæггæнæнтæм гæсгæ цы 745 барадхæлды сбæрæг кодтой, уыдонæн сæ 90 % аиуварс кодтой.
Скъолатæ ног ахуыры азмæ бацæттæ кæнынæн республикæйы бюджетæй схардз кодтой 283 млн сомы бæрц.
Мамсыраты Таймураз бадомдта, цæмæй 25-æм августмæ æппæт скъолатæ дæр уой цæттæ, æппæт аиппытæ дæр хъуамæ иуварсгонд æрцæуой.
