Æппæтæй спортивондæр республикæ… Афтæ схуыдта Мамсыраты Таймураз Цæгат Ирыстон. Абон кадджын уавæры фембæлд дунеон æмæ Æппæтуæрæсеон ерысты призертимæ.
Ивгъуыд азы хатдзæгтæм гæсгæ цæгатирыстойнаг спортсментæ æрмæст олимпаг спорты хуызты рамбылдтой 73 сызгъæрин, 44 æвзист æмæ 72 бронзæ майданы. Спорты иннæ хуызты дæр сæхи тынг хорз равдыстой. Алы къæпхæнты ерысты рамбылдтой 216 майданы.
Кадджын æмбырды УФ-йы Президент Владимир Путины Кады Грамотæйæ Мамсыраты Таймураз схорзæхджын кодта Олимпаг æмæ Æппæтдунеон Универсиадæйы чемпион Хуыгаты Аланы.
Тренерты æмæ спортсменты ма республикæйы сæргълæууæг схорзæхджын кодта «Ирыстоны намысы» майдантæй æмæ грамотæтæй.
Фембæлды куыд загътой, афтæмæй республикæйы рæзы, спортæй чи архайы, уыдоны нымæц. Ныртæккæ сты 132 мин адæймаджы. Уæлдай æхсызгондæр уый у, æмæ сæ фылдæр кæй сты фæсивæд. Уыцы хъуыддагмæ се вæрæн бахастой спортсментæ дæр. Бирæ хæттыты æрыгæттæ, зындгонд спортсменты хуызæн суæвынмæ тырнгæйæ, райдайынц спортæй архайын.
Республикæйы хицауады сæрдаг Такъоты Сергей, Парламенты сæрдары фыццаг хæдивæг Къесаты Станислав, Дзæуджыхъæуы администрацийы сæргълæууæг Дзантиаты Сергей хуыздæр спортсментæн радтой хæрзиуджытæ – республикæйы хицауады сертификаттæ.
Хъыгагæн, ивгъуыд азы æрмæст цины хабæрттæ нæ уыд. Не хсæнæй фæхъуыд хуыздæр спортсментæй иу, стыр спортивон фидæн кæмæн уыд, ахæм æрыгон лæппу – Къудухты Бесик. Æрбацæуджытæ йын, минут æдзæмæй алæугæйæ, ссардтой йæ ном.
