Иу хатт йæ цæгатирыстойнаг студенттимæ схæснаг кодта, ирон æвзаг кæй сахуыр кæндзæн бæлвырд рæстæгмæ, уый тыххæй
Дарддæр нæ программæйы радзурдзыстæм цымыдисаг истори. Маргарита Исаакова цæры Мæскуыйы. Уыд испайнаг æвзаджы ахуыргæнæг. Иу хатт йæ цæгатирыстойнаг студенттимæ схæснаг кодта, ирон æвзаг кæй сахуыр кæндзæн бæлвырд рæстæгмæ, уый тыххæй. Уæд йæ къухы нæ бафтыд æмæ фæхæрд. Фæлæ йæм ацы хъуыддагмæ цымыдисдзинад баззад. Абон Маргаритæйæн йæ бон у йæ хъуыдытæ ирон æвзагыл зæгъын. Æхсызгонæй ссæуы нæ республикæмæ. Бæлвырддæр радзурдзæн Хъайтмазты Дзерассæ.
Хуыриаты Мæдинæ сарæзта дæсныйадæвдисæг ахуыр мæскуыйаг уазæгæн традицион ирон кæлмæрзæн быйынæй. Маргарита Исаакова йæ дæсныйадмæ гæсгæ у юрист, фæлæ уарзы æвзæгтæ ахуыр кæнын. Æнæнхъæлæджы йæм фæзынд цымыдисдзинад ирон æвзаг ахуыр кæнынмæ дæр.
Ирон сси, Маргарита кæй ахуыр кæны, ахæм 9-æм æвзаг. Чызг ахуыр кæны онлайн педагогимæ, стæй йæ социалон хызты равæры ирон æвзагыл видеоæрмæджытæ. 2 къуыримæ йæ бафысджыты нымæц цалдæр минæй фæфылдæр.
Æвзаг ахуыр кæнын куы райдыдта, уæд Маргаритæмæ фæзынд цымыдисдзинад Ирыстоны культурæ æмæ традицитæм дæр. Республикæйы национ музейы базонгæ Хъобайнаг культурæйы коллекциимæ. Фæлындæнтæ, хæцæнгарз, лабиринты нывимæ рагон дур.
Фыццаг хатт Маргаритæ Ирыстонмæ ссыд йæ студентты хуындмæ гæсгæ. Дыгургом, Мидæгрæбинаг æхсæрдзæнтæ, Цъæйы канатон фæндаг – иу балцмæ алцæуылдæр ахæссæн нæй. Ныр чызг хорз зонгæ у республикæимæ æмæ ацы хъуыддаг дарддæр æххæст кæндзæн.
Афтæ хуымæтæг хæснагæй райгуырд стыр уарзондзинад Ирыстонмæ. Æмæ Маргаритæ куыд зæгъы, афтæмæй йыл йæ зæрдæ никуы сивдзæн.
