Спектакль сæвæрдта филиалы сæйраг балетмейстер Суанты Валерий
Æнæмæлгæ классикæ. Мариинаг театры филиал адæмы размæ рахаста иуактон балет «Портрет Дориана Грея» ног хуызы. Спектакль сæвæрдта филиалы сæйраг балетмейстер Суанты Валерий. Артисттæ сценæмæ цы дарæсы рацыдысты, уыдоныл бакуыстой цæгатирыстойнаг нывгæнджытæ Найфонты Давид æмæ Саулаты Нинæ. Сюжеты бындуры ис, æнустæм йе *рыгондзинад бахъхъæнын, йæхи бæсты йæ сурæт зæронд кæмæн кæна, уый кæй фæнды, ахæм адæймаг. Не сфæлдыстадон къорд уыд театры, премьерæйы размæ æвдысты. Чехойты Фатимæйæн ныхасы бар.
19 æнусы Англис. Удыхъæды хуыздæр æмæ æвзæрдæр миниуджыты ныхмæвæрды рæстæг. Æрыгон лæппу фесæфта йæ уды сыгъдæгдзинад. Йе *наккаг митæ фæзындысты йæ сурæтыл. Ацы хабар зындгонд у се *ппæтæн дæр. Уацмысы сюжеты сæйраг бынат ахсы Дориан Грей. У Суанты Валерийы хореографион постановкæйы сæйраг хъайтар дæр. Дунеон литературæйы уацмыс ног хуызы æвæрд æрцыд цæгатирыстойнаг сценæйы.
Ацы чиныг иу кæны фæлтæрты, балет та – æнæмæлгæ классикæйæн аргъгæнджыты. Суанты Валерий фыццаг хатт нæ бакуыста ахæм тыхджын уацмысыл. Йæ хореографийæ равдыста фыссæджы хъуыды ног хуызы, нырыккон царды уавæртæм хæстæг. Арф драматикон сценæтæ æмæ дæсны техникæ – дисы æфтауы актерты курдиат. Декорацитæ дæттынц фадат Англисы 19 æнусы рæстæджы цаутæ ирдæй банкъарынæн.
Актерты дарæсы нывгæнæг Саулаты Нинæйы хæс хуымæтæг нæ уыд. Йæ нысан уыд равдисын Дориан Грейы удыхъæд æмæ хъуырдухæн. Курдиатджын нывгæнæг йæ дæсныйад равдыста хъуымæцтæй пайдагæнгæйæ.
Адæймагæн йæ рæсугъд уынд бамбæхсдзæн йæ удыхъæды æнæраст митæ? Цавæр аргъ ис æнæмæлгæ æрыгондзинадæн? Ацы фæрстытæн дзуæппытæ райсæн уыдзæн балетмæ бакæсгæйæ ног сезоны.
